Zbulohen detaje të reja në lidhje me ngjarjen e rëndë të ndodhur sot në Klos ku mbetën të vrarë babë e bir. Sipas të dhënave nga vendngjarja mësohet se Ilir dhe Kenado Shira u vranë me breshëri plumbash nga Fiqiri Mjeshtri, i cili u gjet i vetvrarë në rrethana ende të paqarta. Ndërkohë për ngjarjen ka dhe një reagim zyrtar nga polica e cila bën me dije se ngjarja ka ndodhur rreth orës 14:15 minuta. “Të plagosur janë Renato dhe Eglantin Hasula. Të plagosurit janë nisur në Tiranë. U bë e mundur kapja e tre personave, Fiqiri, Fatmir dhe Besnik Mjeshtri. Fiqiri Mjeshtri ka ndërruar jetë, është vetëvrarë.” Tha drejtori i policisë.
Ndërkohë mësohet se në momentin e ngjarjes 17-vjeçari ishte takuar me të atin, pasi ky i fundit kishte dalë për ta pritur dhe për tu kthyer bashkë me të në fshatin ku jetonin, Fullqet. I riu ndiqte shkollën profesionale në Klos, por në hyrje të një lokali në këtë qytet, ato janë gjendur përballë breshërisë së armës, ku për pasojë kanë mbetur të plagosur dhe dy të tjerë. Kenado shira sipas dëshmitarëve ka tentuar të mbrojë të atin dhe si pasojë e plumbave ka ndërruar jetë në vend, ndërsa i ati ka mbetur i plagosur, por ambulanca ka vonuar dhe nuk i është dhënë ndihma mjekësore në moment. Gjithashtu sipas dëshmitarëve trupi i pajetë i viktimës ka qëndruar në trotuar për rreth 1 orë e gjysëm në mbërritje të ambulancës. Ende nuk dihet se cilat kanë qenë shkaqet e këtij krimi të rëndë, por policia po punon për zbardhjen e saj.
