Kandidatja për deputete e Partisë Socialiste, Olta Xhaçka, ka shpallur fitoren e PS-së, në Kolonjë duke deklaruar se socialistët kanë marrë 20% më shumë vota sesa opozita e marrë së bashku. Ajo shton se qytetarët e bënë të veten dhe tani i takon qeverisë të bëjë realitet punët dhe projektet.
“Faleminderit çdo socialisti e socialisteje, çdo votuesi të PS që dje na mbështetën me të shumtë se kurrë! Jam pa fjalë, ndihem krenare, por edhe e përulur nga kjo shfaqje e jashtëzakonshme besimi! Kolonja është sot kampione e këtyre zgjedhjeve. Me një rezultat të thelluar ndjeshëm, duke i dhënë Partisë Socialiste 53.3% të votës, 20% më shumë vota sesa opozita e marrë së bashku.
Ju e bëtë tuajën, tani na takon ne të bëjmë realitet ato punë e projekte që kemi diskutuar bashkë në çdo mbledhje e takim, për t’i dhënë Kolonjës atë që meriton! Faleminderit të gjithëve!
Një falenderim nga zemra edhe për vëllezërit e motrat kolonjarë që nuk na votuan, por që ama, bashkë me ne, e kthyen 25 prillin në një festë demokracie e qytetarie! SHQIPËRIA E ARDHMJA JONË”, shkroi Xhaçka.
Partia Socialiste, ku janë numëruar rreth gjysma e votave deri më tani, është në avantazh kundër Partisë Demokratike. Vota kanë marrë edhe LSI dhe PSD, ndërsa pritet që deri në fund, diferenca mes PS-së dhe PD-së të ulet ndjeshëm.
