Basha i kërkon Topallit të bashkohet me opozitën kundër Edi Ramës. Kur u pyet nga gazetarët mbi krijimin e partisë së re nga Jozefina Topalli, kreu i PD-së tha se të gjithë që duan të largojnë Edi Ramën nga Shqipëria, janë të mirëpritur në PD.
“Sapo folëm për një proces që ka përfshirë demokratët në një mënyrë të hapur dhe pa asnjë përjashtim. Po vendosim një standard të ri. Nuk dua të paragjykoj asnjë në opozitë me Edi Ramën. Çdokush që do të bëjë të kundërtën, sado që mundohet ta fshehë, nuk do ja arrijë dot. Ftesa ime mbetet për këdo, nuk dua të flasë me emra. Nuk është çështje individësh. Sidomos për ata brenda PD-së. Kjo është një çështje për të larguar Edi Ramën” – deklaroi Basha.
Kështu, Lëvizjen që pritet të prezantojë këtë të mërkurë ish-nënkryetarja e Partisë demokratike, Jozefina Topalli, Basha e konsideron një përpjekje për të mbajtur në pushtet më gjatë Edi Ramën. Ai thotë se të gjithë ata kritikë që kanë vënë shenjën e barazimit mes opozitës dhe mazhorancës, do e marrin përgjigjen nga qytetarët.
Ndërkohë, duke folur mbi përjashtimin nga gara për kandidatë për deputetë brenda PD-së ish-deputetëve. Basha tha se lë të hapur mundësinë e rikthimit të tyre në lista. Ai tha se vendimi i Komisionit të Vlerësimit do të shqyrtohet nga organet më të larta të PD, Kryesia dhe Këshilli Kombëtar.
Komisioni i Posaçëm i Vlerësimit të Kandidaturave la jashtë listës 13 ish- deputetë, mes të cilëve Ervin Salianji, Endri Hasa, Luan Baçi dhe Tritan Shehu.
Ftesa paradoksale e bërë nga lidershipi i PD-së vjen pasi e ka mënjanuar nga të gjitha postet dhe nuk e kandidoi në zgjedhjet e fundit Topallin. E është e njëjta gjë që ka ndodhur edhe me Astrit Patozin, i cili u detyrua të largohet të krijojë partinë Bindja Demokratike. Po ashtu, drejt krijimit të një partie po shkon edhe lëvizja e fundit e Rudina Hajdarit. Të vetmit që e dëgjuan festën e Bashës ishin Genc Ruli dhe Besnik Mustafaj, të dy pasi kishin deklaruar më parë se jepnin dorëheqjen nga politika.
/GazetaReforma.com/
