Seanca e sotme plenare ka nisur me debate. Deputetët e opozitës kanë rrethuar foltoren duke kërkuar të vijë në seancë kryeministri Edi Rama.
I pari është çuar kreu i PD Lulzim Basha dhe më pas të tjerët. Ndërkohë kryeministri Edi Rama nuk ndodhet në seancë.
Basha: “Në këtë Kuvend ka kohë që ka rënë hija e mortit. Ka 5 vite që PD denoncon këtë dhe tani gjithçka është transmetuar nga mediat. Mbrëmë u transmetua nga VOA. Ai që e ka shndërruar këtë parlament në krim nuk vjen këtu. Kryeautori i asgjësimit të zgjedhjeve nuk denjon as të vijë këtu. Nuk e mbajnë këmbët, nervat, s’ka marrë ilace, apo i ka mbaruar pluhuri. Nuk e di. Ndaj gjëja e parë që duhet bërë është se kjo seancë duhet ndërprerë. Kemi deputetë që s’kanë marrë asnjëherë fjalën se nuk kanë asgjë për të thënë. Jeni në shërbim të një grupi kriminelësh.”
Nga ana tjetër, me gjithë tërheqjen e vëmendjes nga ana e kryetarit të Kuvendit Gramoz Ruçi, i cili paralajmëroi se do merrte masa opozita nuk është bindur.
Ruçi: “Nëse keni probleme me kryeministrin e dini procedurën që duhet të ndiqet. Ministrja e Financave është këtu dhe nuk më bën precedent për të ndërprerë seancën.”
