Parlamenti Evropian nuk do të propozojë pezullimin e negociatave me Beogradin, por do t’i lidhë ato me sanksione kundër Rusisë dhe do të sugjerojë se “negociatat e anëtarësimit do të avancojnë vetëm nëse Serbia respekton sanksionet e BE-së kundër Rusisë”. Lajmi u mësua nga “Blic” nëpërmjet burimeve diplomatike në Bruksel. Në terma diplomatikë – ata do të sugjerojnë që negociatat do të ‘ngrijnë’ derisa Beogradi t’i bashkohet bllokadës kundër Moskës.
“Negociatat e anëtarësimit me Serbinë do avancojnë vetëm nëse vendi përputhet me sanksionet e BE-së kundër Rusisë,”– thuhet në Draft Raport për Strategjinë e Zgjerimit.
Dje u raportua se PE do t’i kërkonte Bashkimit Evropian (BE) të pezullonte negociatat e anëtarësimit me Serbinë derisa të vendosë sanksione ndaj Moskës. Reagimi erdhi pasi të premten ministri i Jashtëm serb Nikola Selakoviç nënshkroi marrëveshjen për “konsultime” të ndërsjella mbi çështjet e politikës së jashtme me ministrin e jashtëm rus Sergey Lavrov. Marrëveshja u nënshkrua ndërsa dy ministrat ndodheshin në Nju Jork për të marrë pjesë në sesionin e Asamblesë së Përgjithshme të Kombeve të Bashkuara, ku shumica e delegacioneve perëndimore shmangën kryediplomatin rus për shkak të agresionit të Rusisë në Ukrainë.
Serbia, një kandidate për anëtarësim në Bashkimin Evropian, varet nga Rusia për furnizimet e saj me gaz natyror dhe ka refuzuar t’u bashkohet sanksioneve perëndimore kundër Moskës për shkak të agresionit të saj në Ukrainë. Nga ana tjetër, Kremlini mbështet Beogradin në kundërshtimin e tij të vazhdueshëm ndaj njohjes së pavarësisë së Kosovës, që u shpall në vitin 2008 me mbështetjen e Shteteve të Bashkuara dhe vendeve kryesore perëndimore./Blic
