Një tjetër ditë me mot të kthjellët dhe diell duket se do të jetë edhe kjo e sotmja, duke marrë parasysh kushtet e qëndrueshme atmosferike që ndikojnë mbi vendin tonë.
Ditën e sotme vendi ynë do të ndikohet nga kushte të qëndrueshme atmosferike, çka përkthehet në një tjetër ditë me mot të kthjellët në të gjithë territorin, bën të ditur Shërbimi Meteorologjik Ushtarak.
Temperaturat në vlerat e mëngjesit parashikohen të mbeten të ftohta, me vlerat nga 0°C në relievet malore, deri në 8°C në ato të ulëta dhe ato bregdetare.
Sa i përket vlerave të mesditës, ato parashikohen nga 12°C në relievet malore, deri në 22°C në ato të ulëta dhe ato bregdetare.
Për t’u theksuar për ditën e sotme është elementi i erës. Deri në orët e pasdites ajo do të fryjë e lehtë deri mesatare me drejtim kryesor nga kuadrati i Veriut dhe shpejtësi mesatare 1-6m/s.
Duke filluar nga orët e mbrëmjes, era fiton intensitet dhe bëhet e fortë dhe intensive me shpejtësi që parashikohet të arrijë deri në 20-25m/s.
Por duhet thënë se, era intensive parashikohet kryesisht përgjatë zonës së Veriperëndimit, vijës bregdetare dhe zonat luginore në Veri.
/GazetaReforma.com/
