Kryetarja e LSI ka paraljmëruar në një lidhje të drejtpërdrejtë në “News24” se kryeministri Rama ka bërë gati botet me ujë dhe gazin lotsjellës për protestat që po bëhen kundër prishjes së Teatrit Kombëtar.
Ditën e sotme ka pasur reagime të shumta nga përfaqësues të Aleancës për Mbrojtjen e Teatrit, por Kryemadhi shprehet se disponon foto që tregojnë se Rama po bëhet gati për të përdorur forcë për të shpërndarë protestuesit para Teatrit Kombëtar.
Ndër të tjera ajo ka thënë se sot është radha e saj për ta gdhirë te teatri dhe nuk do të lëvizë prej andej pavarësisht mjeteve që mund të përdorë Rama për shpërndarjen e protestuesve.
“Dje ishte zoti Basha, sot është radha ime për të ndenjur natën. Dezhurnin si të thuash.
Nesër do jetë dikush tjetër. Është mbështetje morale dhe fizike.
Nuk do guxojë të hyjë asnjë fadromë pa kaluar mbi trupat tanë. Aty jam unë dhe le të shkelin trupin tim.
Zoti Rama i ka bërë gati fadromat, ka lajmëruar dhe gardën dhe FNSH, më çuan fotografi që ka bërë gati botet me ujë dhe bombolat me gaz lotjsellës. Ndryshe nga herët e tjera unë do të qëndroj aty.
Me diagnostikimin që kam unë, nëse hidhet gaz lotsjellës unë vdes në vend. Një pikë gjak po ra në atë shesh është kokë më kokë me Edi Ramën”, deklaroi Kryemadhi duke ngritur edhe akuza shumë të forta ndaj kreut të shtetit Edi Rama.
