Teksa na ndajnë vetëm një muaj nga zgjedhjet elektorale të 25 prillit, Drejtuesi Politik i PD në Elbasan Gazmend Bardhi, ka paralajmëruar se do të ketë përplasje të forta politike nëse nuk do të respektohen standartet e zgjedhjeve.
I ftuar në ‘Spotlight’ në Vizion Plus, Bardhi tha se ashtu si në Elbasan, edhe në Shkodër do të ketë përballje fizike. Bardhi ka rikthyer edhe njëherë vëmendjen te sherri mes militantëve të PS dhe PD në Elbasan për “Ditën e Verës”.
Lidhur me këtë ngjarje, ai tha se incidenti i 14 marsit ndodhi për shkak të disa eksponentëve me rekorde kriminale, të cilët kanë dhunuar qytetarët që kishin dal në shesh për festime.
“Edhe në Elbasan ka patur një përplasje midis mbështetësve të Partisë Demokratike apo mbështetësve të Partisë Socialiste. Nuk ka qenë ky rasti i ngjarjes që ndodhi më 14-Mars. Ka patur një tentativë të disa eksponentëve me rekorde kriminale, anëtarë të krimit të organizuar, të cilët kanë dhunuar qytetarë të Elbasanit që kishin dalë në shesh për të festuar ditën e verës.”, është shprehur Bardhi.
Kujtojmë se për situatën e tensionuar para zgjedhjeve ka reaguar edhe KQZ, e cila bëri thirrje për vetëpërmbajtje dhe respektim të Kodit Zgjedhor.
Një nga ngjarjet që e tenisoni edhe më shumë situatën ishte përplasja e Presidentit Ilir Meta me policët bashkiakë në zyrat e FRD-së. Gjithashtu dhe përballja fizike e deputetit demokrat Luçiano Boçi me biznesmenin lezhjan Gjergj Luca.
Pjesë nga intervista:
Gazmend Bardhi: Përplasje dhe përballje për të garantuar ato standarte të nevojshme për zgjedhje të lira dhe të ndershme
Alban Dudushi: Po thoni se mund të shkojë deri në përplasje fizike?
Gazmend Bardhi: Edhe në Elbasan ka patur një përplasje midis mbështetësve të Partisë Demokratike apo mbështetësve të Partisë Socialiste.
Nuk ka qenë ky rasti i ngjarjes që ndodhi më 14-Mars. Ka patur një tentativë të disa eksponentëve me rekorde kriminale, anëtarë të krimit të organizuar, të cilët kanë dhunuar qytetarë të Elbasanit që kishin dalë në shesh për të festuar ditën e verës.
