Varfëria në disa zona të vendit edhe pse janë të pasura nga natyra është një çështje me rëndësi të veçantë dhe pikërisht për këtë arsye Dom Gjergj Meta ka folur dhe ka treguar të vërtetën e Rrëshenit.
Nga studio e “A Show”, Ipeshkevi i Dioqezës së Rrëshenit është shprehur se në zonën ku ai shërben ka probleme të mëdha sociale ku paradoksi më i frikshëm është ai i pasurisë natyrore që zona ka dhe varfërisë ekstreme në të cilën banorët jetojnë, i cili pasohet edhe nga shpopullimi i zonës.
“Zona që unë përfaqësoj është shumë e varfër, pavarësisht se pasuritë nëntokësore janë të mëdha. Ky është një paradoks i frikshëm. Para se të vija në këtë studio mora një mesazh nga një banor i Bulqizës, i cili më tha ta lexoj mesazhin: Ka 70 vjet që nxjerr krom Bulqiza thuaj dhe është vendi më i varfër në Shqipëri”,- tha ai.
Një tjetër problem që Dom Gjergj Meta solli në studio është shpopullimi i fshatrave.
“Varfëria e dytë përveç asaj materiale është ndjesia që ndjehen të braktisur. Është pak tragjike pasi ato zona janë të lëna pas dore, mungon infrastruktura, rrugët, fshatrat po braktisen nga njerëzit. Një fshat i bukur atje që deri para 9 vitesh kishte 100 nxënës sot ka vetëm 1 nxënës. Kur shkoj atje për meshë s’kam asnjë person të ri. Fshatrat e verilindjes po zbrazen”,- vijoi Dom Gjergj Meta.
