Amerikani Robert Prevost nga Çikago është zgjedhur Papa i ri i Kishës Katolike, duke u bërë i pari në histori që vjen nga Shtetet e Bashkuara të Amerikës.
Gjatë konklavës së mbajtur dje, ai mori emrin Leon XIV një emër që rikthehet për herë të parë që prej papatit të Leon XIII, i cili udhëhoqi nga viti 1878 deri më 1903.
Megjithëse tradicionalisht ka ekzistuar një hezitim për të zgjedhur një Papë amerikan, për shkak të ndikimit të madh global të SHBA-së, Prevost ka gjetur mbështetje të gjerë në radhët e kardinalëve, sidomos nga Amerika Latine.
Kjo lidhet ngushtësisht me përvojën e tij si misionar në Peru, ku kaloi disa vite.
Presidenti amerikan Donald Trump e cilësoi zgjedhjen e tij si “një nder të madh për vendin”.
Ndërkohë, vëllezërit e Papës Leon XIV zbuluan disa momente personale përpara konklavës. Ata rrëfyen se kishin luajtur lojëra fjalësh si “Wordle” dhe “Words with Friends” për ta ndihmuar të çlodhej, madje kishin parë bashkë filmin “Conclave” dhe kishin bërë shaka se ai mund të zgjidhej Papa. “Bëmë shaka, por ja ku jemi sot,” tha vëllai i tij, Louis Prevost.
