Parku fotovoltaik i Karavastasë, vepra më e madhe gjeneruese e energjisë diellore në Shqipëri, është stakuar për shkak të përmbytjes masive që ka përfshirë zonën. Kapitali ka siguruar pamje nga terreni, ku shihet se uji ka vërshuar në të gjithë territorin e parkut diellor të ndërtuar nga kompania franceze Voltalia.
Sipas burimeve për Kapitalin, stakimi i impiantit është kryer një ditë më parë, pasi niveli i ujit arriti në afërsi të paneleve diellore. Ndonëse panelet janë të vendosura rreth 1.5 metër mbi tokë, uji ka arritur deri në rreth 1.2 metër, duke detyruar ndalimin e përkohshëm të prodhimit për arsye sigurie.
Aktualisht, inxhinierët e Voltalias janë duke kryer vlerësimin e plotë të dëmeve të shkaktuara nga përmbytja, ndërsa impianti pritet të vihet sërish në punë pas rreth një jave.
Parku fotovoltaik i Karavastasë ka një fuqi të instaluar prej 140 MW dhe ka kushtuar rreth 140 milionë euro. Ndërtimi i Parku Fotovoltaik i Karavastasë nisi në vitin 2020, pasi qeveria shqiptare e prokuroi projektin përmes një ankandi ndërkombëtar. Voltalia u shpall fituese duke ofruar një çmim shitjeje të energjisë prej 24.89 euro për megavat orë.
Sipas marrëveshjes, shteti shqiptar blen automatikisht gjysmën e energjisë së prodhuar nga impianti me çmimin 24.89 euro për megavat orë, ndërsa kompania ka të drejtë që gjysmën tjetër të prodhimit ta shesë në tregun e lirë.
