Tërmeti që ra para dy ditësh ka shkaktuar dëme në disa pallate në Bulqizë, duke i bërë jofunksionalë.
Si pasojë, 45 banorëve të një pallati të dëmtuar u është kërkuar të evakuohen, duke qenë se rrezikohet jeta e tyre.
Policia e shtetit ka vendosur një shirit në këtë pallat, ndërsa është kërkuar që banorët të largohen nga aty. Ndërkohë ky pallat është dëmtuar nga tërmeti i 2019-ës, ku u vendos për 2 javë shiriti ku tregohej se ai ishte i pabanueshëm.
Një banor i këtij pallati shprehet për “Top Channel” i vendosur për të mos dalë nga banesa:
“Nuk jam dakord fare se kam shtëpinë time aty. Do të rri aty. Pallati ka tre vite që është plasaritur, para se të binte tërmeti i vitit 2019. Nuk është prekur nga tërmeti. Ra tërmeti tjetër para tre ditësh, nuk ka asnjë shenjë. Unë do të rri në shtëpinë time. Nuk kam frikë. Ra tërmeti dhe unë nuk dola fare. Unë nuk dal, kam shtëpinë time, mund të na hedhin në gjykatë. Nuk kam ku shkoj. Të rri jashtë?”, thotë i revoltuar banori.
Por duke qenë se disa banorë nuk pranuan të largoheshin nga banesat e tyre, ata u rikthyen në pallat, ndonëse iu rrezikohej jeta. Siç shihet dhe nga pamjet, pallati është dëmtuar dhe është shpallur i pabanueshëm.
