Ditën e sotme ka hyrë në fuqi paketa ligjore Anti-KÇK.
Ligji u miratua në mbledhjen e Këshillit të Ministrave.
Vendimi u mor pak pasi kryeministri Rama u takua me ambasadoren e SHBA, Yuri Kim.
Ligji parashikon hetimin e 91 krimeve të parashikuara në Kodin Penal, nga vjedhja me armë, tek droga, grupi i strukturuar kriminal, vrasja, falsifikimet, plagosja, rrëmbimi, prostitucioni, terrorizmi, korrupsioni i çdo zyrtari publik e deri tek krimi zgjedhor.
Kjo strukturë ka të drejtë të nisë hetim pasuror për individët që dyshojnë se niveli i jetesës nuk mbulohet nga të ardhurat.
Disa orë pas kalimit të aktit normativ Policia e Shtetit ka gati listën me 250 subjektet e para ku do ndërhyjë.
Sekretari i Përgjithshëm i Ministrisë së Brendshme, Plarent Ndreca ka dhënë detaje lidhur me funksionimin, ku do kryen ndërhyrjet dhe se çfarë parashikon kjo paketë.
“Janë 250 subjekte që janë dyshuar si të dyshuar që bëjnë pjesë, të dënuar, ndjekje penale, apo pasuri të pajustifikuara. Policia ka qenë gati, por i mungonin instrumentet për të ndërhyrë për të parandaluar veprat e tjera penale. Policia nga ky moment mund të ndërhyjë për të vepruar dhe për t’u hequr mundësi që të shfrytëzojnë pasuritë për veprimtari të tjera kriminale.
Janë të dënuar dhe kjo i bën subjekt të këtij ligji, dhe nga ky moment ne do të kërkojmë justifikimin e pasurisë, barrën e provës për të justifikuar pasurinë e kanë ata. Po flasim për persona të dënuar, që pasuritë i kanë krijuar nga veprat penale dhe barra e provës iu bie atyre. Do të hetohet familja. Nëse rast se konstatohet se pasuria është kaluar në emër të të tretëve, do të bllokohet”– tha ai
Me projektligjin e ashtuquajtur anti “Kap Çfarë të Kapim”, qeveria parashikon ndryshime thelbësore sa i përket kontrollit dhe përgjimit të personave të dyshuar si të përfshirë në akte kriminale apo terrorizëm.
