Kryeministri Edi Rama ka zhvilluar një komunikim prej rreth dy orësh me qytetarët në Facebook, ku ka folur rreth masave të marra në kuadër të luftës kundër koronavirusit, ndihmës ekonomike për qytetarët, kthimit të shqiptarëve në atdhe dhe shumë çështjeve të tjera aktuale.
Po ashtu, u ndal edhe te pagesa e qirave që shkaktoi debate të shumta ditën e djeshme.
Në deklaratën e tij, kryeministri tha se të gjithë ata që jetojnë vetëm me një objekt që e kanë dhënë me qira do ketë subvencione nga shteti, nuk do lihen pa ndihmuar.
Po ashtu, do ndihmohen edhe bizneset e vogla.
“Këtu jemi përpara disa kategorish, ne nuk e bëjmë për të gjithë, nuk mund t’u themi dot bizneseve të mëdha që bëjnë miliona lekë xhiro që të mos paguajnë qira. Por ata që punojnë dhe kanë biznes të vogël, ne u themi që jemi në anën tuaj dhe nuk lejojmë askënd që t’i nxjerrë nga ambienti juaj. Të gjithë e kanë bërë me një afat. Ne nuk u themi disave që kanë dhënë me qira një pronë dhe jetojnë me këtë me qira dhe jetojnë me të. U thash dje, që vendimi do ketë detajime, do ketë njoftim nga Drejtoria e Tatimeve. Dëgjojeni me kujdes, individët që jetojnë me qiranë e një mjedisi që e kanë në pronësi dhe nuk kanë të ardhura të tjera do jemi në që do i mbështesim ne në këtë periudhë do ketë subvensione. Ashtu do mbështesim dhe bizneset e vogla.”
Sakaq, Rama tha se të hënën do shqyrtohen 1000 pagat e para “të luftës” dhe se po studiohet që të rritet edhe fondi pren 100 milionësh për garanci sovrane nga shteti që të paguajë puntorët.
“Më thotë Fatma mos bjerë në melankoli por na jep zgjidhje. Lufta ka ardhur për të na bërë dëme të mëdha për të na krijuar halle që nuk e kishim imagjinuar. As unë në punën që jam i nderuar të bej dhe as ju. Ata që kanë humbur punën në një kompani, ne do të ndjekim dinamikën dhe kemi bërë një masë që fillon të zbatohet ditën e hënë. U kemi dhënë në dispozicion një garanci për të paguar ata dhe të mos i heqin nga puna. Këta të partisë së Sudes thonë që nuk do funksionojë. Do ta shohim. Jemi gati që të rrisim 100 milionëshin. I shohim çdo ditë emër për emër të gjithë ata që goditen nga kjo luftë.
Ndërsa për personat që punojnë në të zezë, Rama tha se duhet të gjejnë guximin që të denoncojë pronarin, pasi vetëm kështu do të ndihmoheshin.
Për bukë askush nuk do të vdesë as në kohën e luftës. Ju lutem, bëni durim. Paketa jonë është 2.2 përqind të Prodhimit të Përgjithshëm, pra nuk është e vogël për kohën që zgjat kriza. Për punën në të zezë, ka njerëz që punojnë në të zezë. Ka punëtorë plot të tillë. Këta janë vërtetë në hall. Si mund ta zgjidhë shteti këtë cështje, hallin e dikujt që ka punuar në të zezë. Ata që punojnë në të zezë dhe që sot janë në hall, ta denoncojnë. Kështu, i themi personit që ti do ta paguash punëtorin. Ne po shohim masa edhe për punëdhënësit që pijnë gjakun e punëtorëve”, tha Rama.
