Para dy vitesh “Gazeta Reforma” ka publikuar një artikull në lidhje me një aktivitet të strukturuar kriminal terrorist që kryenin martesa mes të rinjve dhe i dërgonte ata në Turqi, dhe më pas në Siri për të luftuar për të ashtuquajturin Shteti Islamik.
Pjesë e të arrestuarve ishte Dritan Gjeçaj, i cili pas dy vitesh ka ngritur një padi ndaj redaksisë tonë më pretendimin se i është cënuar nderi dhe dinjiteti.
Ai deklaron se nuk është pjesë e grupit të strukturuar kriminal, gjë të cilën “Gazeta Reforma” nuk e ka shkruar në artikullin e saj, përveçse bëhet me dije se Gjeçaj është pjesë e të arrestuarve.
Konkretisht në artikullin tonë shkruhet: “Policia italiane së bashku me atë shqiptare prangosën 10 persona (4 italianë, 5 shqiptarë dhe 1 kanadez) për pëfshirje në organizatë. Shqiptarët u identifikuan si: Baki Çoku, Dritan Gjeçaj, Aldo Kobuzi, Arta Kakabuni, dhe Lubjana Gjeçaj”.
Ai kërkon që të përgënjeshtrohet lajmi si dhe një dëmshpërblim në vlerën e njëmilion lekëve të vjetra, por kërkesat e tij nuk kanë baza.
Theksojmë se dokumentet italiane, të cilat mund t’i lexoni këtu, tregojnë të njëjtin informacion që edhe redaksia jonë ka përcjellë.
E vërteta është që Dritan Gjeçaj është arrestuar me këtë grup dhe është hetuar, fakt që hedh poshtë përgënjështrimin që do të bëjë ai.
Edhe pse Gjeçaj pretendon se pas arrestimit është shfajësuar, ky lajm nuk është përmendur në asnjë media.
Nga ana tjetër, fakti që është shfajësuar nuk i jep të drejtën të kërkojë nga mediat përgënjështrimin e një lajmi i cili është i vërtetë.
Autoriteti i medias gjithnjë e më shumë po zbehet në sy të qytetarëve dhe këtu një kountribut të madh ka vetë qëndrimi i kryeministri i vendit, Edi Rama.
Duke i konsideruar mediat si “kazanë” dhe me shumë epitete të tjera, iu krijon hapësirën e mjaftueshme qytetarëve të mendojnë se edhe kur janë fajtor mund të hedhin “baltë” mbi artikujt e mediave dhe jo vetëm. /Gazeta Reforma
