Udhëheqësit e Austrisë, Republikës Çeke, Bullgarisë, Sllovenisë dhe Letonisë i kanë shkruar Bashkimit Evropian duke bërë thirrje për një diskutim mbi shpërndarjen e vaksinave COVID-19 brenda bllokut pasi Austria u ankua se ishte e pabarabartë.
Kancelari austriak Sebastian Kurz tha të Premten se dozat e vaksinave nuk po përhapeshin në mënyrë të barabartë midis vendeve anëtare pavarësisht nga një marrëveshje brenda bllokut për ta bërë këtë sipas popullsisë. Ai fajësoi marrëveshjet e ndara të bëra midis bordit drejtues të vaksinimit të BE dhe kompanive të ilaçeve.
Kurz tha në Twitter të Shtunën se ai dhe katër homologët e tij kishin bërë thirrje për diskutime për të gjetur “një zgjidhje evropiane” në një letër të përbashkët. Letra, drejtuar Presidentes së Komisionit Evropian Ursula von der Leyen dhe Presidentit të Këshillit Evropian Charles Michel, u botua nga media austriake.
“Në ditët e fundit … ne kemi zbuluar se … shpërndarjet e dozave të vaksinave nga kompanitë farmaceutike në vendet individuale anëtare të BE nuk po zbatohen në bazë të barabartë duke ndjekur çelësin e popullsisë “, thuhej në letër.
“Prandaj, ne ju bëjmë thirrje, Charles, të zhvilloni një diskutim mbi këtë çështje të rëndësishme midis udhëheqësve sa më shpejt të jetë e mundur.”
Malta do të ketë tre herë më shumë doza vaksinash në krahasim me popullsinë e saj deri në fund të qershorit sesa Bullgaria, ka thënë Kurz. Letra nuk përmendi grupin drejtues, i cili dihet prej kohësh se është pjesë e një mekanizmi me të cilin shtetet anëtare ndajnë dozat e tepërta ndërmjet tyre. Nënkryetari i bordit drejtues është austriak.
