Kreu i Organizatës Botërore të Shëndetësisë ka bërë sërish thirrje për një moratorium dy-mujor në administrimin e dozave përforcuese të vaksinave COVID-19 si një mjet për të zvogëluar pabarazinë globale të vaksinave dhe parandalimin e shfaqjes së varianteve të reja të koronavirusit.
Drejtori i Përgjithshëm i OBSH -së Tedros Adhanom Ghebreyesus shprehu zhgënjimin e tij para gazetarëve në Budapest. Kjo pasi shumë vende po luftojnë ende për dozat e para dhe të dyta të vaksinës, për më shumë se fraksione të vogla të popullsisë së tyre, ndërsa vendet e pasura ruajnë rezervat në rritje të vaksinave.
Tedros u bëri thirrje vendeve që ofrojnë doza të treta të vaksinës që t’i ndajnë ato me me vendet e tjera në mënyrë që ato të mund të rrisin mbulimin me dozat e dyta për një pjesë më të madhe të popullsisë.
Deri tani janë disa vende që ofrojnë ose janë duke planifikuar që t’u ofrojnë qytetarëve të tyre doza përforcuese të vaksinës për Covid-19, mes tyre Shtetet e Bashkuara, Izraeli dhe Hungaria, si dhe të tjera në Evropë, Lindjen e Mesme dhe Azi.
Hungraia u bë vendi i parë në Bashkimin Europian që në fillim të gushtit miratoi dozën e tretë të vaksinës për qytetarët e saj dhe deri tani, sipas statistikave të qeverisë, më shumë se 187,000 njerëz kanë marrë një dozë përforcuese.
