Më herët ditën e sotme u raportua se të hënën do zhvillohet mbledhja e Këshillit Bashkiak, ku do vendoset prishja e godinës së Teatrit Kombëtar, por gjithçka është zhvilluar sot fshehurazi.
Këshilli Bashkiak i Tiranës ka vendosur shembjen e Teatrit Kombëtar dhe në vendimin e Këshillit Bashkiak të publikuar thuhet; “Për miratimin e shembjes së godinës të “Teatrit Kombëtar”, pasuri në pronësi të bashkisë Tiranë, bazuar në akt-ekspertizën e hartuar nga Instituti i Ndërtimit “Mbi vlerësimin e godinës së teatrit Kombëtar” që mban datën e sotme thuhet se me propozimin e Kryetarit të Bashkisë, Këshilli Bashkiak vendosi miratimin e shembjes së godinave të Teatrit Kombëtar.
Në një vendim të firmosur sot nga kryetari i Këshillit Bashkiak Toni Gogu, bëhet me dije se është mirautar shembja e godinës së ‘Teatrit Kombëtar’, pasuri në pronësi të bashkisë Tiranë, bazuar në akt-ekspertizën e hartuar nga Instituti i Ndërtimit ‘Mbi vlerësimin e godinës së teatrit Kombëtar’, teksa propozimi për ketë vendim është bërë nga kryetari Erion Veliaj dhe tashmë pritet që godina e Teatrit të shembet.
Bashkia merr të gjitha masat për nisjen dhe ndjekjen e procedurës së ndërtimit të godinës bashkëkohore dhe me standarde të Teatrit Kombëtar.
“Inspektorati i Mbrotjes së Territorit në përputhje me aktet ligjore dhe nënligjore për planifikimin e territorit merr të gjitha masat për ndërhyrjen dhe shembjen e objektit të përcaktuar në pikën 1 (Teatri Kombëtar) të këtij vendimit. Policia Bashkiake, Drejtoria e Përgjithshme e Objekteve Publike, Drejtoria e Përgjithshme e Pastrimit dhe Gjelbërimit, Drejtoria e Përgjithshme e Rrugëve dhe Ndriçimit Publik, Agjencia e Parqeve dhe Rekreacionit, mbështesin Inspektoratin për Mbrotjen e Territorit për ndërhyrjen dhe Prishjen e objekteve”, shkruhet në dokumentin e bashkisë.
Megjithatë, Bashkia do e ketë të vështirë pasi Alenaca për Mbrojtjen e Teatrit ka premtuar rezistencë deri në fund, teksa ka marrë edhe mbështetjen e opozitës dhe Presidentit.
