Policia e Fierit është angazhuar intensivisht për të zbardhur plotësisht ngjarjen tragjike që çoi në vdekjen e efektivit të Shqiponjave, Novruz Canaliaj. Sipas autoriteteve, 12 persona janë marrë në pyetje lidhur me këtë rast, duke përfshirë edhe prindërit e Azgan Mënicës, të dyshuarit kryesor në këtë vrasje.
Një dëshmitar kyç në këtë ngjarje është Ajete Mernica, nëna e Azganit, e cila ishte bashkëudhëtare me të birin në momentin e krimit. “Gjithçka ka ndodhur shumë shpejt,” ka rrëfyer ajo. Ajete tregon se ka parë të birin të zbresë nga makina dhe të përfshihet në një konflikt me policin, ndërsa më pas ka dëgjuar një të shtënë arme. Sipas saj, menjëherë pas ngjarjes, Azgani është ngjitur përsëri në makinë dhe ata janë larguar drejt banesës së vëllait të Ajete Mernicës. “Djali iku me vrap nga shtëpia pa i thënë se ku do shkonte,” shton ajo.
Ndërkohë, dëshmitë e të rinjve të pranishëm në vendngjarje kanë qenë po ashtu të rëndësishme për të ndërtuar skenarin e ngjarjes. Punimet vazhdojnë me intensitet të lartë për kapjen e Azgan Mënicës, të cilin policia e konsideron autorin kryesor të kësaj vrasjeje.
Policia ka vendosur poste bllokuese dhe ka intensifikuar kontrollin e automjeteve në rrugën që lidh Semanin me Fierin. Gjithashtu, janë përdorur dronë për të kontrolluar zonat rurale aty pranë, ku dyshohet se autori mund të jetë fshehur.
