Pas paralajmërimit të kryeministrit të vendit Edi Rama, për përfshirjen e vendit në një krizë energjitike, OST dhe OSHEE kanë bërë lëvizjen e radhës. Mësohet se Operatori i Sistemit të Shpërndarjes së Energjisë Elektrike dhe Operatori i Sistemit të Transmetimit ditën e sotme kanë njoftuar Entin Rregullator të Energjisë se do të depozitojnë dosjen me kërkesën për rritjen e çmimit.
Burime bëjnë me dije se kërkesa e OSHEE dhe OST pritet të depozitohet në ditët në vijim.
OSHEE dhe OST pritet që në raportet që do të dorëzojnë të justifikojnë kërkesën për rritjen e çmimit, me argumentin e humbjes në kosto. Ende nuk dihet se çfarë do të ndodhin deri në vitin 2022, nëse në fuqi do të jenë të njëjtat tarifa apo do të ketë rritje të çmimit. Pasi do të jetë vendimi i Bordit të Entit Rregullator të Energjisë, ai që do të miratoj tarifat finale, që do të aplikohen në vitin 2022.
Duke filluar që nga viti 2014, OSHEE dhe OST, kanë dërguar disa kërkesa në drejtim të “ERE”-s, por që bordi i këtij institucioni i ka rrëzuar.
Kujtojmë se në vitin 2020 Enti Rregullator i Energjisë ka zhvilluar edhe konsultime me grupet e reja në lidhje me tarifat e reja që kërkoi OST-ja , por u ndërprenë për shkak të pandemisë globale të COVID-19.
Por ajo që është më problematike tani është fakti se të gjitha zgjidhjet që do të ofrojë qeveria dhe grupi i punës nuk do të jenë në favor të qytetarëve. Mënyrat që do të sugjerohen për të dalë nga kriza do të jenë të vonuara, pasi rritja e taksave dhe borxheve do të jetë e pashmangshme dhe e gjitha kjo situatë e krijuar ka për qëllim vjedhjen e sa më shumë parave nga tregtia e energjisë, e cila duket se tashmë po i tregon provat.
