Prezenca e OSBE/ODIHR në Shqipëri u ka bërë thirrje autoriteteve shqiptare që të zbatojnë rekomandimet e raportit të zgjedhjeve të 25 prillit.
Në një postim në Facebook, OSBE shkruan se mbështet fushatën ndërgjegjësuese të kreut të KQZ-së, Ilirjan Celibashi dhe inkurajon autoritetet shqiptare që të vënë në zbatim rekomandimet.
“I bashkohemi fushatës ndërgjegjësuese të Komisionerit Shtetëror të Zgjedhjeve Ilirjan Celibashi për rekomandimet e OSBE/ODIHR-it në raportin e zgjedhjeve të fundit dhe i inkurajojmë autoritetet shqiptare t’i vënë ato në zbatim”, shkruhet në rekomandim.
Ndër rekomandimet e OSBE është edhe hetimi i të gjitha pretendimeve për shkelje zgjedhore, përdorim të burimeve shtetërore në kohë, në mënyrë të plotë dhe transparente.
Po ashtu, OSBE vë në dukje se shteti duhet të garantojë të drejtën për zgjedhje të lira dhe të fshehta, ndërsa çdo formë presioni për të zbuluar nëse dikush ka votuar apo jo dhe si ka votuar, duhet të parandalohet. OSBE bën thirrje që agjencitë e zbatimit të ligjit duhet të intensifikojnë përpjekjet për të identifikuar dhe ndjekur penalisht rastet e shitblerjes së votës. Ndërkohë, OSBE inkurajon edhe qytetarët që të raportojnë dhe të japin prova të cdo rasti të shitblerjes së votave apo ushtrimit të presionit.
Më tej theksohet se Shqipëria duhet të garantojë sigurinë e të dhënave personale të qytetarëve dhe institucionet duhet të garantojnë besimin e qytetarëve në procesin zgjedhor.
