Disa orë më parë u publiku drafti i “Anti-shpifjes” që do dorëzohet nesër në Parlament.
Paketa ka pësuar disa ndryshime pas spekulimeve të ditës së sotme.
Lidhur me këtë ka reaguar edhe OSBE.
Nëpërmjet një statusi në Twitter, Harlem Desir, përfaqësues i Lirisë së Medias në OSBE ka deklaruar se drafti është përmirësuar.
Po ashtu, Desir shkruan se puna do vazhdojë për të ulur nivelin e gjobave të parashikuara në ligj.
“Ne kemi punuar me Kryeministrin Rama dhe Qeverinë e Shqipërisë deri në minutën e fundit për të përmirësuar projektligjet për median, dhe për t’i sjellë ato në përputhje me standardet ndërkombëtare dhe rekomandimet e OSBE-së. Shumë përmirësime në versionin e fundit të botuar sot në krahasim me projektligjet e mëparshme: detyrimet e regjistrimit janë eliminuar; masa mbrojtëse të përgjithshme lidhur me standardet ndërkombëtare të prezantuara (neni 4); janë futur kufij të rreptë për marrjen e përmbajtjes (neni 132); rregullimi i së drejtës së përgjigjes është përshtatur me nevojat e botimeve elektronike dhe është kufizuar për të shmangur keqpërdorimet (neni 53/1); atribuimi i ri i AKEP është eleminuar. Puna do të vazhdojë për të ulur nivelin e gjobave, dhe për miratimin e një instrumenti nënligjor të ardhshëm, në mënyrë që të garantohet se nuk mund të vendosen gjobitje jo proporcionale për ofruesit e shërbimeve elektronike të publikimit.”
Në fund të fjalës së tij, Desir ka lënë të nënkuptohet se paketa do të miratohet, pasi shprehet:
“Zyra ime do të monitorojë nga afër zbatimin e ligjit i cili në asnjë mënyrë nuk duhet të pengojë lirinë e shprehjes dhe lirinë e mediave. AMA duhet të zbatojë ligjin në një mënyrë vërtet të pavarur.”
Kujtojmë se edhe Rama ka mbajtur të njëjtin qendrim lidhur me miratimin e paketës “Anti-shpifje”.
