Sheshi “Liria” dhe bulevardi “Epidamn” u mbushën me muzikë dhe atmosferë festive të hënën mbrëma, në një aktivitet artistik që tërhoqi vëmendjen e qindra qytetarëve dhe vizitorëve në qytetin bregdetar të Durrësit.
Orkestra Frymore e Durrësit, nën drejtimin e dirigjentit Saimir Kalaja, dhuroi një koncert mbresëlënës, ku tingujt solemnë të marshimeve dhe interpretimet klasike krijuan një mbrëmje të paharrueshme për artdashësit. Kalimi përgjatë bulevardit shoqërohej me duartrokitje të shumta nga publiku entuziast.
Aktiviteti ishte pjesë e programit kulturor veror, i konceptuar për të gjallëruar sezonin turistik dhe për të ofruar një eksperiencë të veçantë artistike për vizitorët vendas dhe të huaj.
Një nga momentet më të veçanta të mbrëmjes ishte interpretimi i solistes Juna Ruçi, e cila emocionoi publikun me zërin e saj të fuqishëm dhe interpretimin plot ndjenjë.
Repertori përfshinte një ndërthurje të bukur mes krijimeve të kompozitorëve shqiptarë si Prenk Jakova dhe Feim Ibrahimi, me vepra të autorëve të njohur ndërkombëtarë si Georges Bizet, Dmitri Shostakovich, Ludwig van Beethoven, Ennio Morricone dhe grupit legjendar “The Beatles”.
