Apeli i Posaçëm ka miratuar vendimin e Shkallës së Parë për Dedan Gjonin, Algert Rapin, Rexhep Rapi dhe Dejvi Gjermëni, duke lënë në fuqi dënimet për secilin prej tyre.
Rexhep Rapi është dënuar me 5 vite burg, ndërsa Algert Rapi, Dedan Gjoni dhe Dejvi Gjermëni janë dënuar me nga 4.8 vite burg.
Ata akuzohen për kryerjen e veprave penale “Sigurimi i kushteve dhe mjeteve materiale për të kryer vrasje” në dëm të shtetasit Xhevdet Kiss (Plaku), si dhe për “Kryerjen e veprave penale nga grupi i strukturuar kriminal dhe organizata kriminale”.
Në vitin e shkuar, Policia e Durrësit arriti të arrestojë Rexhep Rapin, i njohur si “i forti i Sukthit” dhe me nofkën Kep Arapi, gjatë një operacioni në Durrës. Gjatë këtij aksioni, u arrestuan gjithashtu nipi i tij dhe një ish-punonjës policie.
Rexhep Rapi dyshohet se ka qenë i përfshirë në një tentativë vrasjeje që kishte si objekt ish-shefin e Komisariatit nr. 6 të Policisë, Dedan Gjoni. Ky i fundit u përfshi në përgjime të dekriptimit të aplikacionit Sky ECC, ku një grup kriminal me pjesëmarrës Ervin Matën dhe Erzen Breçanin, u zbulua dhe ra në duar të drejtësisë shqiptare.
Përmes përgjimeve, u zbulua se Gjoni kishte nxjerrë në pritë një person për llogari të Kep Arapit. Ai e kishte thirrur këtë person në komisariat dhe kishte njoftuar anëtarët e grupit kriminal për orarin dhe vendndodhjen e tij, duke e vënë në rrezik. Fatmirësisht, personi ka arritur të mbijetojë.
Po ashtu, dyshohet se urdhri për këtë vrasje të mundshme ka ardhur nga Holanda dhe lidhet me prishjen e pazareve të drogës. Për Dedan Gjonin është ngritur një akuzë e re dhe Prokuroria ka kërkuar një masë të re sigurie për të.
