Koncerti i Malumës mori shumë vëmendje, ndërsa përshtypje bënë deklaratat e Ramës dhe Veliajt ku mohonin të kenë dhënë lekë që Maluma të zhvillonte koncertin në sheshin “Nënë Tereza” në Tiranë. Rama madje tha që nuk ka hedhur kokërr leku duke iu referuar këngëtarit si ‘Malumja’ pra duke bërë sikur nuk e njeh. Ndërkohë Veliaj tha se Malumës i ka dhënë ‘borxh’ vetëm sheshin, por asnjë qindarkë.
Edi Rama:
Sot e mora vesh, se më shkruanin që keni dhënë lekë për Malumën. Nuk është paguar asnjë lekë për koncertin e Malumës nga asnjë buxhet publik, as i qeverisë, as bashkisë. Sepse pyeta ç’a është ky Maluma… E ka sjellë këtu një kompani private, e këta që dalin në protestë flasin për Malumën e ju thonë ‘ky e ka sjellë atë…’. Unë as e dija kush ishte Maluma.
Erion Veliaj:
Njëzetë mijë vetë në Tiranë vendosën të shkojnë në koncert. Këtë nuk e ndalon dot, se edhe një koncert i sjell vlerë qytetit. Një natë më parë, Maluma dha koncert në Paris, sot është në Londër, ose anasjelltas – pra, në dy kryeqytete të rëndësishme të Europës. Bashkia e Tiranës sigurisht që do t’ia japë sheshin për koncert sepse s’mund t’i themi se meqë 200 vetë protestojnë, do ndalojmë çdo gjë tjetër. Dje kishte njerëz që donin të dilnin për të festuar Ditën e Verës dhe dolën.
Këto thonë politikanët tanë që mbahen me taksat dhe votat tona, por çfarë thotë njëra prej organizatorëve të koncertit të Malumës, Uarda Koçi.
Në një deklaratë ajo ka nxjerrë ‘blof’ si Ramën, ashtu edhe Veliajn, teksa tha se Bashkia Tiranë ka dhënë një fond prej 50 milionë të vjetra që Maluma të zhvillonte koncertin në vendin tonë.
Uarda Koçi:
Ky është aktivitet në bashkëpunim me Bashkinë e Tiranës. Këshilli i Kulturës, ka miratuar një fond ndihmë për…5 milionë lekë të reja. 50 milionë të vjetra.
