Pjesa më e madhe e opozitës në Kosovë ka refuzuar këtë të hënë një takim të thirrur nga Kryeministri Albin Kurti në lidhje me diskutimin e një sërë ligjesh, që do të dominojnë sesionin pranveror në Kuvendin e Kosovës. Por ftesës së Kurtit i është përgjigjur pozitivisht vetëm kreu i Partisë Demokratike të Kosovës Memli Krasniqi. PDK ka bërë me dije se fokusi i bisedës mes Krasniqit e Kurtit do të fokusohet tek zgjedhjet e reja parlamentare dhe jo tek ligjet. Takimi pritet të nisë në orën 18:30.
“Partia Demokratike e Kosovës ka pranuar ftesën e kryeministrit Albin Kurti për një takim pune, për të hënën, dhe mund ta konfirmoj që kryetari Memli Krasniqi do të marrë pjesë në këtë takim. Prandaj edhe pjesëmarrja e kryetarit Krasniqi në këtë takim do të jetë në funksion të diskutimit për mundësinë e caktimit të datës për zgjedhje të reja”, ka konfirmuar për KOHËN zëdhënësi i PDK-së, Faton Abdullahu.
Ndërkohë kreu i Aleancës për Ardhmërinë e Kosovës Ramush Haradinaj e ka refuzuar ftesën me pretendimin se tema për të cilën i ka thërritur Kurti, mund të diskutohet me krerët e grupeve parlamentare dhe nuk është e nevojshme të jenë kryetarët e partive.
“Besnik Tahiri, i cili udhëheq grupin tonë parlamentar dhe kolegë të tjerë, jam i bindur se do të diskutojnë në frymën kolegiale dhe do të gjejnë një gjuhë që pastaj do të përçohet në Kuvend nga grupet tona parlamentare për zbatim. Konsideroj se kjo temë bie drejtpërdrejtë në përgjegjësinë dhe në dijen e tyre”, thuhet në përgjigjen e Haradinajt të publikuar në Facebook të shtunën.
Ftesën e refuzoi dhe kryetari i Lidhjes Demokratike të Kosovës, Lumir Abdixhiku. Ky i fundit në përgjigjen refuzuese të ftesës së Kurtit, shkruan se kjo ftesë është e vonuar. Ndërsa akuzon shefin e ekzekutivit të Kosovës për mbjellje të polarizimit ndaj partive politike.
“Në përgjigje të letrës tuaj, e konsideroj të vonuar tani që, pas tre vitesh e gjysmë në pushtet, të tentoni të gjeni një klimë bashkëpunimi kur keni shuar rrënjësisht frymën e bashkëpunimit e kur keni mbjellë polarizim ofendues të skajshëm ndaj të gjitha partive politike tjera në Kosovë dhe përfaqësuesve të tyre”, thuhet në letrën e Abdixhikut drejtuar Kurtit.
