Ditën e sotme është mbajtur mbledhja e radhës në Komisionin hetimor për impiantet e trajtimit të mbetjeve urbane, ku opozita ka kërkuar më shumë kohë në lidhje me hetimet.
Ka qenë deputeti Lefter Gështenja, ai që ka propozuar shtyrjen afateve me dy muaj, në mënyrë që të ketë dhe një rezultat më të mirë në përfundim të hetimeve.
Afati i Komisionit Hetimor skadon në datën 25 Shkurt, dhe opozita propozon që ai të shtyhet deri në 23 Prill.
“Kompanitë fituese janë të lidhura ngushtë me pushtetin, afati prej dy muajsh do të ishte i mjaftueshëm për të bërë një punë hetimore më të mirë. Qeveria ka nisur pagesa ende pa përfunduar projekti”, thanë mes të tjerave deputetët e opozitës në Komision.
Komisioni parlamentar miratoi dje planin e hetimit për inceneratorët, përfshi listën e personave që do të pyeten. Nga 21-23 shkurt do të thirren për të raportuar Edi Rama, Arben Ahemtaj, Damian Gjiknuri, Engjell Agaçi dhe Erion Veliaj.
Deputetja Jorida Tabaku deklaroi nga Kuvendi se kryeministri Edi Rama i ka konfirmuar pjesëmarrjen në këtë proces.
Pjese e listës së dëshmitareve është edhe ish-ministri Lefter Koka.
Tabaku nënvizoi se do të bëhen vizita në të 3 inceneratorët për të cilat do të prezantohet nga një dosje.
Pas arrestimit të Lefter Kokës për inceneratorin e Elbasanit, kanë nisur hetimet edhe për inceneratorin e Fierit dhe të Tiranës. Prokurorët e çështjes janë Dritan Premçi dhe Vladimir Mara.
