Detaje të reja janë zbardhur nga megaoperacioni antidrogë i koduar “Ura”, i zhvilluar nga SPAK në bashkëpunim me antimafian italiane dhe BKH-në.
Aksioni ndërkombëtar është fokusuar në goditjen e një rrjeti të trafikut të narkotikëve dhe pastrimit të parave, që operonte mes Shqipërisë dhe Italisë.
Në total janë lëshuar 52 urdhër-arreste, ndërsa janë sekuestruar pasuri me vlerë miliona euro në të dyja vendet.
Të përfshirë në këtë skemë kriminale rezultojnë avokatë, ish-zyrtarë policie, biznesmenë, persona të lidhur me botën e krimit dhe zyrtarë të tjerë publikë.
Në Shqipëri, një nga emrat që bie në sy është Ervis Doçi, i njohur si “Visi i Pojës” nga Durrësi. Emri i tij ka qenë i lidhur më parë me ngjarje kriminale dhe vitin e kaluar, SPAK zbuloi rreth 3 milionë euro cash në banesën e tij në Durrës.
Gjithashtu, urdhër-arrest është lëshuar edhe për avokatin Armand Tragaj, ish-sekretar i Këshillit Bashkiak të Durrësit.
Ndër të ndaluarit është edhe administratori i një kompanie transporti, Ligor Çombashi, si dhe Orges Molla, i cili rezulton të jetë ish-punonjës policie dhe pjesë e një grupi të strukturuar kriminal.Molla ishte larguar pak kohë më parë nga radhët e Policisë së Shtetit.
Operacioni përfshiu kontrolle në disa baza dhe banesa në qytetet e Tiranës, Durrësit, Vlorës dhe Fierit, ndërsa pamje ekskluzive të shpërndara nga antimafia italiane tregojnë çanta të mbushura me para, pako me kokainë dhe regjistrime të fazës hetimore.
Të dyshuarit akuzohen për trafik ndërkombëtar droge, pastrim parash dhe shpërdorim detyre.
Operacioni është produkt i një hetimi disa mujor të nisur më herët nga Krimet e Rënda, që ka çuar në shkatërrimin e një prej rrjeteve më të mëdha kriminale që vepronte në dy shtete.
