Prokurori i Anti-mafias italiane, De Raho dhe kreu i SPAK, Arben Kraja zhvilluan një konferencë të përbashkët për operacionin ndërkombëtar të anti-drogës të shtrirë në Shqipëri, Itali, Mal të Zi dhe Spanjë.
Shefi i Antimafias italiane, Federico Cafiero De Raho, tha se sot u arrit një objektiv madhor, ndërsa vlerësoi bashkëpunimin me SPAK.
“Dua të përshëndes kreun e SPAK, Arben Krajën, të cilin e komplimentoj. Prej kohësh kemi operuar së bashku për këtë operacion dhe me një raport me shumë intensitet që arritur rezultate të jashtëzakonshme. Dua të them edhe një herë bashkëpunimi mes Italisë dhe Shqipërisë është veçanërisht intensiv, i ngushtë dhe konstant. Dua të nënvizoj se prej kohësh kemi përgjegjshmërinë të bashkëpunojmë me respektin që lidh dy zyrat për të arritur rezultate të jashtëzakonshme. Sot është arritja e një objektivi që tregon se si bashkë arrijmë të ndjekim edhe aspekte që lidhen me ‘pabesinë’ e disa institucioneve mbi të cilat vendet tona duhet të tregojnë kujdes të veçantë. Kemi bërë një ndarje konstante të informacionit. Dua të vlerësoj edhe DIA dhe policinë shqiptare që kanë bërë një detyre të një delikatese të jashtëzakonshme. Është arritur të shkatërrohet një organizatë me një shtrirje ndërkombëtare. Do të vazhdojmë të operojmë së bashku. Arben Kraja me ekipin e tij ka një kapacitet të jashtëzakonshëm në drejtim të hetimit”.- tha De Raho.
Kujtojmë se banda e trafikantëve të drogës u shkatërrua nga bashkëpunimi që paten 4 të penduar në Itali. Gjatë operacionit ndërkombëtar “Shpirti” u arrestuan 28 persona, ndërsa 10 të tjerë ishin arrestuar disa kohë më parë
IIirjan Balla, shefi i sektorit kundër trafiqeve në Policinë e Shtetit, Prokurori i Vlorës, Maksim Sota, ish-oficeri i policisë, Festim Lelaj, i proceduar më parë për trafik narkotikësh si dhe Saimir Kurti drejtor i zyrës së Punës në Kavajës janë disa nga emrat e dalë deri më tani, ndërkohë që operacioni është në vijim.
