Gjykata e Posaçme e Apelit ka lënë në fuqi masën e sigurisë për të gjithë të arrestuarit gjatë operacionit që u shtri në disa shtete, i cili u kodua “Shpirti”. Mësohet se në “arrest shtëpie “, janë lënë prokurori Maskim Sota, ish zv.drejtori i Policisë së Vlorës, Ilirjan Balla dhe dy të arrestuarit e tjerë Abdyl Krasniqi dhe Luan Krasniqi. Ndërsa për të arrestuarit e tjerë gjatë operacionit ndërkombëtarë është lënë në fuqi masa “arrest me burg.
Kujtojmë se operacioni “Shpirti” i shtrirë në disa shtete si Shqipëri, Italia, Spanja dhe Mali i Zi, u zhvillua më dy korrik. Të përfshirë janë dhe dy ish-shoqëruesit e ish-ministrit të brendshëm, Saimir Tahirit, Hekuran Marku dhe Agustin Deda të cilët dyshohen se kanë pasur rol aktiv në trafikun e drogës drejt Italisë. Gjithashtu mes të arrestuarve janë prokurorë dhe zyrtarë të lartë të policisë së shtetit. Në këtë operacion janë sekuestruar në total 6 ton lëndë narkotike marijuanë, kokainë dhe hashash, 55 milion euro dhe një sasi totale prej 14 milion dozash njëshe që dalin nga shpërndarja me pakicë. Nga rrëfimi i katër të penduarve të drejtësisë, u arrestuan 38 persona, përfshirë prokurorë, zyrtarë policie, si dhe dy shoqëruesit e ish-ministrit të Brendshëm, Saimir Tahiri. Nga hetimet e SPAK, në bashkëpunim me autoritetet e antimafias italiane, rezulton se grupet kriminale kanë trafikuar të paktën 6 tonë drogë përgjatë viteve 2014-2017 nga Shqipëria drejt Italisë.
