Ditën e sotme Agjencia e Mbikëqyrjes Policore ka reaguar lidhur me operacionin e ditës së djeshme të SPAK ku u lëshuan 32 urdhër arreste për persona të cilët ishin përfshirë në vepra të shumta kriminale.
Në reagimin e bërë, thuhet se AMP, po hetonte çdo dyshim lidhur me mundësinë e dekonspirtimit të operacionit.
Reagimi i Plotë:
Agjencia e Mbikëqyrjes Policore (AMP) po verifikon çdo dyshim nëse ka patur rrjedhje informacioni, gjatë operacionit të zhvilluar nga Prokuroria e Posaçme Kundër Korrupsionit dhe Krimit të Organizuar dhe Policia e Shtetit, në kuadër të procedimit penal nr.75/2022, përmes të cilit u caktuan dhe ekzekutuan masat e sigurimit personal të karakterit shtrëngues “Arrest në burg” për 32 shtetas, mes tyre edhe një punonjës policie.
Në përfundim të këtij operacioni, Agjencia e Mbikëqyrjes Policore siguron opinionin publik dhe mediat se do të hetojë me seriozitetin maksimal çdo dyshim për rrjedhje të mundshme të informacionit nga punonjës të policisë, si edhe çdo përfshirje nëse ka, në aktivitete të paligjshme.
AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit, duke telefonuar në numrin e gjelbër 0800 9090.
Në operacionin “Golden Bullet”, u goditën 8 grupe kriminale, ndaj të cilave kishte prova të grumbulluara pasi Nuredin Dumani dhe Henkrik Hoxhaj pranuan të bashkëpunonin me drejtësinë.
