Kreu i Policisë së Shtetit, Ardi Veliu ka folur në lidhje me operacionin ndërkombëtar të koduar “DOBRA”, i organizuar në bashkëpunim me policinë spanjolle dhe atë gjermane. Veliu ka thënë se ky operacion vërteton se policia shqiptare është tashmë një partner i besueshëm për goditjen e krimit të organizuar në të gjitha vendet aty ku ka shqiptarë. Ai tha se policia nuk do të mjaftohet me këtë operacion dhe do të vazhdojë edhe në Shqipëri, duke identifikuar pronat e ardhura si rezultat i aktivitetit criminal.
Veliu deklaroi se duke goditur pjesën ekonomike, do i jepet një goditje tepër e fortë grupeve kriminale.
“Kemi bashkëpunuar me policinë spanjolle vazhdimisht. Kjo vërteton edhe njëherë se policia shqiptare është tashmë e pjekur jo vetëm momentalisht por edhe një partner i besueshëm për të bërë goditjen e krimit të organizuar në të gjithë vendet aty ku ka shtetas shqiptarë. Ne nuk do të mjaftohemi vetëm me këtë operacion, do të vazhdojmë në vendin tonë duke identifikuar të gjitha pronat që mund të kenë ardhur si rezultat i aktivitetit kriminal të këtyre shtetasve. Duke i goditur edhe në pjesën ekonomike i japim një goditje tepër të fortë grupeve kriminale duke i paralizuar”, ka thënë kreu i Policisë së Shtetit.
Në kuadër të operacionit “DOBRA” u kryen kontrolle në 51 ambiente, nga të cilat 23 plantacione/shtëpi bari. Gjithashtu u asgjësuan rreth 25 mijë bimë narkotike kanabis.
