Prej disa ditësh IKMT-ja po vazhdon aksionin për prishjen e ndërtimeve pa leje në zonat bregdetare. Ministri i Brendshëm, Bledi Çuçi ka treguar shifrën marramendëse të gjobave që janë vendosur , ndërsa operacioni i quajtur “Bregdeti Ynë “vazhdon misionin për prishjen e subjekteve.
Sipas ministrit Çuçi deri më tani janë vendosur nga IKMT 67 milionë lekë të reja gjoba ndaj 44 subjekteve që kanë ndërtuar pa leje në bregdet.
“Që prej nisjes së operacionit dhe deri më sot Inspektoriati Kombëtar i Mbrojtjes së Territorit krahas shembjes së ndërtimeve pa leje dhe pastrimit të inerteve, ka vendosur 67 milionë lekë gjoba për 44 subjekte. IKMT dhe Policia e Shtetit po vijojnë operacionin sipas planit të punës në ato zona të bregdetit ku janë evidentuar objektet e ngritura në shkelje të ligjit. Po e pastrojmë të gjithë vijën bregdetare nga Velipoja në Ksamil, me bindjen se kjo është rruga e duhur për të mbrojtur këtë pasuri tonën të përbashkët dhe për të mbështetur zhvillimin e qëndrueshëm të turizmit. Gjej shesh të lirë, zapto e ndërto pa leje, të mos e mendojë më askush”, shprehet ministri Çuçi.
Pjesa më e madhe e subjekteve të gjobitura është në zonën e Ksamilit, më pas vijon me Velipojën e Shëngjinin. Dy ditë më parë IKMT dhe Policia e Shtetit e shtrinë operacionin në Shëngjin. Në ditët e ardhshme do të vazhdohet me zona të tjera të bregdetit sipas hartës me njollat ku janë evidentuar objekte të ngritura pa leje.
