Mbrëmjen e djeshme u organizua një operacion ‘blic’ në Durrës ku u arrestuuan 17 persona, mes të cilëve edhe efektivë policie e zyrtarë shteti.
Mes të arrestuarve rezulton se është edhe specialisti i Krimeve, nën/komisar, Ermand Petova.
Ai akuzohet se ka shpërdoruar detyrën, duke lejuar ndërtime pa leje.
Mirëpo, po ashtu ndaj tij rëndon edhe një akuzë tjetër: ai nuk ka kryer veprimet ligjore për arrestimin e një shtetasi që kërkohet për përdhunim.
Sipas ‘Dosja.al’, më 9 nëntor 2019 Petova ka referuar materialet hetimore në ngarkim të Sami Hoxhës, një shtetas i akuzuar nga gruaja V.J., se kishte kryer marrëdhënie seksuale me forcë në makinën e tij.
Sami Hoxha është shpallur më 5 nëntor 2019 në kërkim, me kartelën ngjyrë “rozë”.
Petova ka raportuar se ka shkuar për kontroll në banesën e të akuzuarit, por nuk e ka gjetur atje.
Mirëpo, janë bërë disa verifikime sipas të cilave rezulton se nga data 6 deri më 8 nëntor, Sami Hoxha dhe Ermand Petova, kanë komunikuar në telefon, për shkak të njohjes mes tyre.
“Më datë 5 nëntor, nga ana e specialistit të krimeve të rënda janë referuar materialet në Prokurorinë e Durrësit për shtetasin S., i datëlindjes 25 shtator 1987, banues në fshatin Rr., sepse më datë 3 nëntor 2019 ka bërë një kallëzim penal shtetësja me inicialet V., pasi në fshatin Rrotull është përdhunuar nga S. Më 5 nëntor 2019, ky shtetas është shpallur në kërkim pasi akuzohet për veprën penale marrëdhënies seksuale me dhunë me të rritura. Specialisti i krimeve E., ka raportuar se ka vajtur për kontroll banese tek banesa e shtetasit S., dhe nuk e ka gjetur atë në shtëpi”, thuhet në dosjen e Prokurorisë.
Siç shihet nga tabulatet telefonike, ndonëse polici ka informacion se Sami Hoxha është në shtëpi, ai nuk merr asnjë masë ndaj tij.
Po ashtu, Petova ka neglizhuar edhe një tjetër rast.
Më 10 nëntor 2019, ai ka marrë në dorëzim një denoncim për vjedhjen e një dyqani në fshatin Rrotull.
Efektivi nuk ka referuar asnjë person në prokurori, ndonëse për këtë ngjarje ka patur dijeni edhe Shefi i Stacionit, Sami Xhafaj, SPZ, Petrit Neziri
Tashmë Petova është arrestuar dhe pritet që Prokuroria të marrë vendimin ndaj tij dhe 16 të arrestuarit e tjerë.
