Detaje të reja janë zbuluar nga operacioni ndërkombëtar antidrogë “Ura”, që po zhvillohet paralelisht në disa qytete të Shqipërisë dhe në Itali.
Mes të ndaluarve është edhe administratori i një shoqërie që operon në transportin e pasagjerëve me autobusë.
Operacioni i përbashkët mes autoriteteve shqiptare dhe italiane synon goditjen e një strukture kriminale të përfshirë në trafikun ndërkombëtar të drogës, pastrimin e parave dhe shpërdorimin e detyrës. Deri tani janë ekzekutuar 52 urdhër-arreste në të dy vendet.
Arrestimet janë kryer në Fier, Durrës dhe Vlorë, ndërsa mes të ndaluarve figurojnë edhe avokatë, biznesmenë, zyrtarë policie dhe emra me precedentë penalë.
Operacioni është ndërmarrë nga Drejtoria Antimafia e Barit dhe SPAK, në bashkëpunim me Interpolin, Eurojust-in dhe strukturat kombëtare të hetimit në të dyja shtetet.
Gjykata e Posaçme në Tiranë dhe gjykata italiane për hetime paraprake kanë firmosur gjithashtu urdhra për sekuestrime pasurish të paluajtshme dhe mjete, me vlerë disa milionë euro.
Hetimet janë pjesë e një procesi më të gjerë që synon çmontimin e rrjeteve shqiptare të trafikut të kokainës dhe heroinës drejt Europës Veriore dhe rajonit të Pulias.
