Një operacion ndërkombëtar kundër krimeve kibernetike është finalizuar nga autoritetet shqiptare në bashkëpunim me partnerët ndërkombëtarë.
Operacioni, i koduar “Platforma”, është zhvilluar nën drejtimin e SPAK dhe në bashkëpunim mes Drejtorisë për Hetimin e Krimeve Kibernetike dhe Forcës së Posaçme Operacionale.
Gjatë kontrolleve të kryera në tre ambiente të ndryshme, u sekuestruan si prova materiale:
• 2 aparate celularë
• 1 laptop
• 1 njësi kompjuterike
• 1 USB
• 1 hard disk i jashtëm
• 40,020 euro cash
Operacioni është zhvilluar në kuadër të një letërporosie të lëshuar nga autoritetet gjermane, me mbështetjen e Europol.
Objekt i hetimit është një grup i dyshuar kriminal i strukturuar, i cili akuzohet për mashtrime përmes një platforme të rreme investimesh online.
Sipas të dhënave paraprake, grupi ka arritur të mashtrojë mbi 100 qytetarë, me një dëm ekonomik që kalon vlerën e 3 milionë eurove.
Operacioni përfshiu autoritetet e Shqipërisë, Gjermanisë, Qipros dhe Izraelit dhe u koordinua nga Eurojust dhe Europol. Hetimet mbi këtë rrjet mashtrues vazhdojnë.
NJOFTIMI I POLICISË:
Policia e Shtetit.
Finalizohet operacioni ndërkombëtar kundër krimeve kibernetike i koduar “Platforma”.
Operacioni në Shqipëri nga Drejtoria për Hetimin e Krimeve Kibernetike, në bashkëpunim me Drejtorinë e Forcës së Posaçme Operacionale nën drejtimin e SPAK.
Me mbështetjen e Eurojust dhe Europol, operacioni u zhvillua në disa shtete si Gjermani, Shqipëri, Qipro dhe Izrael.
Në Tiranë, sekuestrohen mijëra euro e pajisje që shërbenin për kryerjen e krimeve kibernetike.
Drejtoria për Hetimin e Krimeve Kibernetike në bashkëpunim me Drejtorinë e Forcës së Posaçme Operacionale në Departamentin e Policisë Kriminale në kuadër të operacionit ndërkombëtar të koduar “Platforma” ka kryer ekzekutimin e vendimeve të Gjykatës së Posaçme të Shkallës së Parë për Korrupsionin dhe Krimin e Organizuar, për ushtrimin e tre kontrolleve në ambiente të ndryshme.
Gjatë operacionit u ushtruan kontrolle në tre ambiente të ndryshme, ku u sekuestruan në cilësinë e provës materiale 2 aparate celularë, 1 laptop, 1 njësi kompjuterike, 1 USB, 1 hard disk i jashtëm, një shumë parash prej 40 020 eurosh.
Ekzekutimi i këtyre vendimeve është realizuar në kuadër të një letërporosie të lëshuar nga autoritetet gjermane, me mbështetjen e Europol, në kuadër të një hetimi ndërkombëtar për një grup të strukturuar kriminal të përfshirë në mashtrime përmes një platforme të rreme investimesh online.
Grupi kriminal dyshohet se ka mashtruar mbi 100 viktima me një dëm financiar prej mbi 3 milionë euro.
Operacioni është zhvilluar në kuadër të një veprimi të koordinuar ndërkombëtar që përfshiu autoritetet e Gjermanisë, Shqipërisë, Qipros dhe Izraelit, me mbështetjen e Eurojust dhe Europol.
Policia e Shtetit mbetet e angazhuar në bashkëpunimin ndërkombëtar për goditjen e grupeve kriminale që operojnë në fushën e krimeve kibernetike dhe mashtrimeve financiare. Hetimet vijojnë.
