Policia e Shkodrës ka kryer një operacion të gjerë kundër kultivimit të kanabisit, ku janë asgjësuar mbi 19 mijë bimë dhe fidanë të dyshuar si cannabis sativa.
Ky operacion, me emrin “Koordinata”, u organizua bazuar në informacione të inteligjencës policore dhe përfshiu kontrolle në disa zona të qarkut.
Në Shkodër, në njësitë administrative Shalë, Pult, Postribë dhe Gur i Zi u shkatërruan 201 fidanë dhe 651 bimë, ndërsa janë proceduar penalisht kryetari i fshatit Kir, S.H., dhe roje mjedisi L.A., i akuzuar edhe për moskallëzim krimi.
Në Vau i Dejës, në Shllak dhe Temal, u asgjësuan 893 fidanë dhe 16,700 bimë, ndërsa në Pukë, njësia Qerret, u shkatërruan 1,050 bimë.
Në Fushë Arrëz, në zonën administrative Iball, u asgjësuan 174 bimë, dhe në Malësi e Madhe, zona e Shkrelit, u shkatërruan 70 bimë.
Policia po vijon hetimet për identifikimin dhe ndëshkimin e përgjegjësve, ndërsa operacioni “Koordinata” vazhdon dhe priten kontrolle të tjera në rajon.
