Operacioni Forca e Ligjit (OFL) juridikisht ka pushuar së ekzistuari më 31 dhjetor 2020.
Policia nuk do t’jua çojë më formularët të dënuarve për justifikimin e pasurisë. Po ashtu, policja bionde me syze të errëta nuk do dalë më në konferencë shtypi.
OFl është një nga dopiogjashtat që i ka lënë pasardhësit, ish-ministri Lleshaj. Ai është ideatori dhe këshilltari i kryeministrit për të ashtuquajturën paketë KCK (ku ishte pjesë edhe OFL)
Burime nga ministria e Brendshme konfirmojnë se para ikjes, Lleshaj kishte dërguar në qeveri një akt normativ për OFL, i cili parashikonte një shtyrje të afatit. Por, me sa duket, Rama i zhgënjyer nga puna e vartësit nuk ka qenë dakord me zgjatjen e mandatit të OFl-së. Drafti propozonte edhe një ndryshim lidhur me pjesëmarrjen e subjekteve të OFL-së në tendera. Pa pritur vendimet e formës së prerë të gjykatave, ministria mendonte se “subjektet që janë referuar në SPAK për fshehje pasurie, të mos kenë të drejtë për të përfituar tenderë e PPP për 3 vite”.
Nga praktika e deritanishme, SPAK i ka kthyer mbrapsht OFL-së për plotësim dokumentacioni e parregullsi, një sasi të konsiderueshme dosjesh.
Pra, pikëpyetja e madhe që lind është se kush do të merret tani me korrigjimin e dosjeve që ka kthyer mbrapsht SPAK-u, tani që OFL shkrihet.
Rreth gjysma e hetimeve pasurore të Policisë së Shtetit bazuar në Operacionin “Forca e Ligjit” janë kthyer mbrapsht nga prokuroria si të pa mbështetura në ligj dhe në prova.
Prokuroria e Posaçme SPAK në bilancin e punës për vitin 2020 ka paraqitur një raport të detajuar në lidhje me ecurinë e operacionit forca e ligjit, të zhvilluar nga policia e shtetit bazuar në aktin normativ që hyri në fuqi në fund të janarit 2020.
Sipas të dhënave që bëhen të ditura nga SPAK, për periudhën 1 shkurt 2020 deri në 19 dhjetor 2020, Prokuroria e Posaçme ka regjistruar gjithsej 226 materiale të paraqitura për vlerësim nga Drejtoria e Përgjithshme e Policisë së Shtetit.
Nga ky total i materialeve të paraqitura nga policia, SPAK bën me dije se prokurorët kanë dërguar 113 kërkesa për sekuestro në gjykatë, si dhe 55 kërkesa për konfiskim pasurie, nga të cilat sipas të dhënave të Gjykatës së Posaçme, janë pranuar vetëm 11.
Ndërkaq, në 42 raste prokurorët kanë urdhëruar heqjen e sekuestros së vendosur paraprakisht nga ana e policisë së shtetit ndërsa për 50 materiale të tjera të përcjella nga policia, SPAK ka vendosur kthimin e dosjeve në Drejtorinë e Përgjithshme të policisë për plotësim.
Organi i akuzës ka dorëzuar në gjykatë edhe 7 kërkesa për vendosje mase parandaluese individuale ndërkohë që 14 materiale janë ende në proces vlerësimi nga prokurorët.
Por numri i dosjeve që janë pa u ezauruar është më i madh. Janë mbi 1500 pasuri që presin një vendim nga gjykata, sipas burimeve nga Ministria e Brendshme.
Operacioni Forca e Ligjit nisi punën në janar të këtij viti me aktin normativ numër 1 datë 31 janar 2020 dhe në nenit 38 të tij parashikon afatin e efektit të përkohshëm deri më 31 dhjetor 2020.
OFL u propagandua nga qeveria si një goditje fatale ndaj krimit, por deri më tani nuk ka rezultuar në bllokimin e asnjë pasurie madhore, përveç atyre që janë sekuestruar si pasojë e akteve kriminale që kanë kryer subjektet dhe prokuroria për rrjedhojë ka bllokuar pasuritë e tyre, por jo në verifikim dhe zbulim të pasurive të krimit. Përveç kësaj, OFL u implikua nga skandali i nxjerrjes së sekreteve nga kupola drejtuese, përfshirë drejtorin e saj, Artan Shkëmbi.
/Gazetareforma.com/
