Katër anëtarët e grupit të Shullazit janë ankuar për të dytën herë për gjyqtaren Saida Dollani. Ata kanë kërkuar përjashtimin e Dollanit nga trupa gjykuese.
Të pandehurit Emiliano Shullazi, Blerim Shullazi, Gilmando Dani dhe Endrit Zela, i kanë drejtuar një kërkesë zyrtare ONM-së dhe KPK-së ku janë shprehur se kanë humbur besimin se gjyqtarja Dollani do të tregohet e paanshme me ta.
“Kemi humbur çdo lloj besimi te Saida Dollani, ajo ka kryer shkelje ligjore ndaj kërkesave tona.11 seanca dhe çështja s’ka filluar të gjykohet. Me veprimet e saj insistuese përtej arsyes dhe kërkesës së ligjit, gjyqtarja ka krijuar dyshime thelbësore se motivimi i saj nuk është thjeshtë kryerja e detyrës, por marrja e një pozicioni “heroiko-stoik”, duke synuar të jetë me çdo kusht gjyqtarë në këtë çështje, ku të pandehurit gjerësisht dhe në cenim të parimit të prezumimit të pafajësisë janë stigmatizuar tashmë si element me ngarkesë të fortë kriminale”, kanë qenë fjalitë e kërkësës së të pandehurve.
E gjitha kjo ka ardhur pasi sipas tyre Dollani kaloi në fyerje personale për të pandehurin Emiliano Shullazi, duke e cilësuar gënjeshtar e frikacak.
