Numri i infermierëve në mbarë botën ka arritur në 29.8 milionë, sipas një raporti të fundit të Organizatës Botërore të Shëndetësisë.
Megjithatë, raporti thekson se rritja nuk ka ardhur e shpërndarë në mënyrë të barabartë, rreth 78% e infermierëve punojnë në vende që përfaqësojnë vetëm gjysmën e popullsisë globale.
Rajoni Europian kryeson për nga numri i infermierëve në raport me popullsinë, me 7.2 milionë të punësuar dhe një densitet prej 76.9 infermierë për çdo 10 mijë banorë, më i larti në shkallë globale.
Megjithatë, edhe brenda këtij rajoni evidentohen pabarazi të ndjeshme, ku disa shtete kanë mbi 200 infermierë për 10 mijë banorë, ndërsa të tjerët janë shumë larg këtij niveli.
Në Shqipëri, raporti infermierë ndaj popullsisë mbetet nën mesataren europiane, edhe pse vendi renditet ndër më të lartët për nga numri i diplomimeve në këtë fushë.
Një pjesë e madhe e tyre largohet për të punuar jashtë vendit, duke reflektuar një trend global: një në shtatë infermierë në botë ushtron profesionin jashtë vendlindjes.
Popullsia infermierore në Europë është gjithashtu relativisht e re, rreth një në tre infermierë është nën moshën 35 vjeç, ndërsa gratë përbëjnë 85% të këtij sektori.
Sipas parashikimeve të OBSH, deri në vitin 2030 numri i infermierëve do të rritet në 36 milionë, por mungesat do të përqendrohen në rajonet më të varfra si Afrika dhe Lindja e Mesme, të cilat do të mbajnë mbi 70% të boshllëqeve globale në këtë fuqi punëtore.
