Në një kohë kur bilanci i viktimave nga koronavirusi po thellohet me shpejtësi dhe pikëpyetjet rreth tij po shtohen dita-ditës, duket se edhe Organizata Botërore e Shëndetit është e pafuqishme përballë armikut të padukshëm.
Më herët ditën e sotme, zëdhënësi i OBSH, David Nabarro, në një intervistë për BBC tha se nuk dihet sa do zgjasë gjendja nga COVID-19 dhe se mbajtja e maskave do kthehet në një normë në të ardhmen.
OBSH: Mbajtja e maskës do kthehet në normë, nuk e dimë kur koronavirusi do të zhduket
Së fundmi, shpresat janë zbehur edhe nga drejtori i përgjithshëm i OBSH-së, Tedros Adhanom Ghebreyesus i cili tha në një konferencë se ritmi i pandemisë së koronavirusit do të bjerë shumë herë më avash nga sa mund të mendojmë ne.
“Ndërsa Covid-19 përkeqësohet shumë shpejt, situata përmirësohet shumë më ngadalë. Me fjalë të tjera, rruga për zbritje është shumë më e ngadaltë se rruga për lart.”
Ghebreyesus tha nga Gjeneva se vendet që po konsiderojnë lehtësimin e masave dhe heqjen e distancimit social, duhet të tregohen shumë të kujdesshëm.
“Kjo do të thotë se masat e kontrollit duhet të hiqen ngadalë dhe me kontroll. Nuk mund të bëhen të gjitha menjëherë. Masat e kontrollit mund të ngrihen vetëm nëse janë vendosur masat e duhura të shëndetit publik.”
Sipas të dhënave të pasqyruara në worldometers.info, deri më tani nga koronavirus janë infektuar 1, 886, 516 persona, ndërsa 117,537 kanë humbur jetën në të gjithë botën.
Me 1,514 viktima në 24 orët e fundit, Shtetet e Bashkuara kanë tejkaluar 22,100 vdekje nga koronavirusi si dhe janë raportuar më shumë se 557 mijë e 500 të infektuar me Covid-19.
Deri tani në Francë numërohen rreth 133, 600 raste të identifikuar pozitiv me Covid-19 kurse numri i vdekjeve nga infeksioni është 14, 412.
Sakaq, Gjermania ka një situate shumë të normalizuar pasi ka më shumë njerëz të shëruar sesa njerëz që ende vuajnë nga koronavirusi dhe në 24 orët e fundit, rastet e testuar pozitiv ishin 2,537, të cilat e çojnë numrin total në 127, 854, pak më shumë se 50% e të cilave tani janë shëruar.
Në Spanjë shkalla e kurimit është aktualisht 37%, në Itali 22%, në Francë 21% dhe në Britani të Madhe ajo është ende 0.3%.
Sipas BBC, Gjermania ka një shkallë vdekshmërie më të ulët sesa Spanja, Italia, Franca dhe Mbretëria e Bashkuar, sepse ajo kryen më shumë teste të tamponit, dhe për këtë arsye gjithashtu regjistron raste më pak serioze dhe të lehta të infektuar nga koronavirusi.
