Vazhdon situata e rënduar nga reshjet në zonën e Nënshkodrës. Oboti është izoluar për shkak të përmbytjeve, ndërsa kreu i njësisë administrative Ana e Malit, Arben Ceni, shprehet se gjatë 24 orëve të fundit ka pasur rritje të ndjeshme të nivelit të lumit Buna ç’ka ka sjellë edhe bllokimin e rrugës nga rruga nacionale Shkodër – Muriqan në drejtim të fshatit Obot.
Ceni ka bërë apel për furnizim me bazë ushqimore për bagëtinë, ndërkohë që rreth 100 shtëpi janë të izoluara nga uji.
Zona e Obotit është e përmbytur prej 18 ditësh ndërkohë që dita e sotme konsiderohet si dita më e vështirë ku ky fshat është i izoluar plotësisht.
Ndërkohë edhe lumi Shkumbin ka pësuar rritje të nivelit të ujit ku ka dhe shumë prurje. Lumenjtë Ishëm e Vjosa janë fryrë dhe rrezikojnë daljen nga shtrati i tyre. Në zonën e Fushë-Krujës mbi 50 banesa janë të rrethuara nga uji. Mbi 10 familje janë avakuuar nga fshati Fitore për shkak të prurjeve të shumta nga lumi Vjosë.
Ndërkohë në Korçë reshjet e dëborës kanë mbushur rrugët ku kalimi bëhet vetëm me zinxhirë dhe goma dimërore.
Edhe ditën e djeshme reshjet e shumta të shiut kanë shkaktuar shumë problematika. Lumi Ishëm doli nga shtrati e për pasojë dhjetra hektarë tokë bujqësore u përmbytën në fshatrat Murqinë, Mallkuç dhe Bilaj.
Në lumin Drin e Mat janë rritur prurjet, por nga sa raportohet deri tani nuk përbëjnë rrezik për të dalë nga shtrati. Në Lezhë, problem është furnizimin me energji elektrike, ndërsa në Finiq një urë e kanalit ujitës është ndarë në dysh. /Gazetareforma.com/
