Dy ditë më parë Fieri u trondit nga grabitja dhe vrasja e 8-vjeçarit Mateo Vasiu nga Klodian Çalamani.
Familjarët e Mateos, 8-vjeçarit që u vra nga fqinji i tij dhe më pas u gropos, kërkojnë drejtësi.
Mes lotëve dhe dëshpërimit që i ka kapluar, ata kanë lënë ambientet e gjykatës së Fierit, ku u caktua edhe masa ‘arrest me burg’ për Klodian Çalamanin, dhe i janë drejtuar qendrës së qytetit, ku po mbledhin firmat e qytetarëve, pasi kërkojnë dënim me varje për autorin.
“E fute në dhe babain”, dëgjohet teksa thotë i ati i 8-vjeçarit, ndërsa më pas ai thërret me zë të lartë dhe një premtim; ‘O Mateo, nuk të lë babai’.
Theksojmë se momente tensioni janë shënuar vetëm pak momente më parë në Gjykatën e Fierit, ku familjarët e 8-vjeçarit Mateo kanë hyrë në ambientet e gjykatës.
Ata kanë tentuar që të thyejnë çdo gjë. Familjarët e kanë hapur derën me forcë dhe janë përplasur dhe me punonjësit e policisë. Familjarët dëgjohen duke thënë: Duam drejtësi!
Ndërkohë gjykata e Fierit ka caktuar masën “arrest me burg” për autorin e vrasjes makaber të 8-vjeçarit Mateo Vasiu në Grecalli, ngjarje e cila ndodhi dy dite me pare.
Seanca gjyqësore është zhvilluar pa prani të autorit 38-vjeçar Klodian Calamani ndërsa nga policia është marrë deklarata e tij ku shprehu vullnetin që gjykimi te behej ne mungese te tij.
Ndërkohë nga trupi gjykues me pjesëmarrjen e gjyqtares Sonila Hoxha dhe prokuror Clirim Sino është caktuar masa e sigurimit arrest me burg.
