Kanë kaluar plot 12 orë nga fillimi i numërimit të votave të zgjedhjeve parlamentare të 25 prillit. Rezultatet e deritanishme nga KQZ, në rang kombëtar kryeson Partia Socialiste me 49.51% e ndjekur nga Partia Demokratike, me 38.72%. Deri më tani, janë numëruar 1695 kuti nga 5199, ku vihet re se Partia Socialiste kryeson me 234.530 vota dhe ndiqet nga Partia Demokratike, me 183.427 vota. Më pas, vjen LSI, me 33.674 vota.
Ndërkohë mundësi për të marrë mandate kanë edhe PSD, e cila ndodhet në vendin e katërt me 9290 vota. Rezultatet e deritanishme për pesë partitë që kryesojnë, janë:
– Partia Socialiste me 234.530 – 49.51%
– Partia Demokratike me 183.427 – 38.72%
– LSI me 33.674 – 7.11%
– PSD me 8296 – 1.96%.
Votimet kanë nisur ditën e djeshme në orën 07:00 të mëngjesit dhe shqiptarët kanë pasur mundësinë të votojnë deri në orën 19:00 të pasdites. Që pas përfundimit të zgjedhjeve, komisionerët në pikat e votimit kanë nisur menjëherë me numërimin e votave. Deri më tani, ka mbaruar numërimi vetëm te njësia numër 10 në Tiranë, ku fitoi Partia Socialiste. Edhe pse PD ka marrë rreth 2000 vota më shumë se në 2017 në këtë njësi, sërish ishte PS që fitoi.Numërimi i votimeve vazhdon me ritme të larta në të gjitha qytetet e Shqipërisë, ndërsa kreu i KQZ-së, Ilirjan Celibashi, u shpreh se numërimi do të përfundojë brenda 48 orësh, duke dhënë afatin e fundit ditën e nesërme.
