Policia e Shtetit ka vazhduar inspektimet në terren për respektimin e masave kufizuese në vend, ndërsa në 4 ditët e fundit janë gjobitur 2584 qytetarë. Nga këta 2546 janë ndëshkuar sepse nuk mbanin maskën mbrojtëse. Po ashtu me masë administrative janë ndëshuar edhe 300 shtetas që udhëtonin në mjete private ose të transportit publik dhe nuk mbanin maskën. Me gjobë 1 milionë lekë të reja janë ndëshkuar edhe 3 subjekte që ushtronin aktivitetin pas orarit të përcaktuar për mbyllje.
Njoftimi i Policisë:
Policia e Shtetit
Ndëshkohen me masë administrative 2584 shtetas që nuk zbatuan masat anticovid, gjatë 4 ditëve të fundit.
2546 prej tyre janë ndëshkuar për mosmbajtjen e maskave mbrojtëse.
Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, vijojnë kontrollet në të gjithë vendin, për të monitoruar zbatimin e masave për parandalimin e përhapjes së COVID-19.
Gjatë 4 ditëve të fundit, Patrullat e Përgjithshme kanë ndëshkuar me masë administrative 3.000 lekë, 2246 shtetas që janë konstatuar pa maskat mbrojtëse.
Shërbimet e Policisë Rrugore kanë ndëshkuar me të njëjtën masë administrative, 300 shtetas që udhëtonin në mjete private me persona me të cilët nuk kishin lidhje familjare apo në mjetet e transportit publik, pa vendosur maskat mbrojtëse.
Gjatë kontrolleve në subjekte të ndryshme, shërbimet e Policisë kanë evidentuar 3 subjekte që ushtronin aktivitetin në kundërshtim me protokollet e sigurisë. Për pronarin e secilit subjekt është vendosur masa administrative 1.000.000 lekë.
Gjithashtu janë ndëshkuar me masë administrative 10.000 lekë, 35 shtetas që janë konstatuar duke lëvizur në këmbë pas orës 20:00.
Në zbatim të masave anticovid, Policia e Shtetit apelon për të gjithë qytetarët dhe drejtuesit e mjeteve që të respektojnë orën policore, të vendosin maskën dhe të ruajnë distancimin social, ndërsa subjektet tregtare, lokalet dhe restorantet të respektojnë protokollet e sigurisë dhe orarin e mbylljes, me qëllim parandalimin e përhapjes së COVID-19.
