Fasoneritë vijojnë të jenë vatra të nxehta të koronavirusit në Krujë, teksa raste të reja po raportohen çdo ditë.
Së fundmi, Shqiptarja.com shkruan se 4 raste të reja janë konfirmuar me Covid-19 në rrethin e Krujës, nga 36 teste të kryera gjatë 24 orëve të fundit.
Sipas informacioneve paraprake, mësohet se 4 rastet e fundit vijnë nga vatrat e fasonerisë dhe kontakteve të tyre, ndërkohë që ende po kryehet hetimi epidemiologjik.
Kështu, shkon në 111 numri i të infektuarve në Krujë, teksa pritet edhe përditësimi i bilancit nga Ministria e Shëndetësisë.
Duket se mos-mbyllja e fasonerive në kohë, ka shkaktuar infektime të shumta në vendin tonë, pasi qeveria arsyetoi se këto biznese nuk mund të mbyllen sepse po punojnë në kushte të sigurta dhe mbi të gjitha konsiderohen si biznese esenciale.
Një fasoneri në Krujë është bërë shkak që virusi të përhapet jo vetëm tek punonjësit brenda kësaj fasonerie, por edhe tek punonjëset e saj nga Laçi dhe Kurbini, të cilët e transmetuan edhe tek familjarët e tyre.
Sakaq, deri tani janë konfirmuar edhe 7 raste me Covid-19, punonjës fasoneri në kryeqytet, teksa nuk dihet ende nëse ato do kthehen në vatër infeksioni.
Duke qënë se fasoneria është kthyer në një vatër infektimi, Instituti i Shëndetit Publik ka vendosur që të mbyllë biznesin.
Nga sa ka rezultuar deri tani, ndonëse drejtuesit e tyre bënin me dije se kishin respektuar të gjithë protokollet e përcaktuara nga Ministria e Shëndetësisë, duket se ato nuk janë përmbushur, ndërsa punonjëset kanë akuzuar se pretendimet e tyre nuk ishin të vërteta dhe se në fabrikë nuk kishin as sapun për duart.
Edhe kryedemokrati Lulzim Basha, ashtu si edhe figura të tjera kanë kërkuar mbylljen e tyre dhe përfshirjen e punonjësve në planin ekonomik të qeverisë.
