Policia ka vijuar me kontrollet për zbatimin e masave për parandalimin e përhapjes së koronavirusit.
Si rezultat i kontrolleve, Policia e Durrësit ka gjobitur administratorin e një call center në lagjen nr.1 të Durrësit me 700 mijë lekë të reja.
Kjo masë administrative u mor për shkak se punonjësit nuk ishin pajisur me maska mbrojtëse.
Gjithashtu është gjobitur me 100 mijë lekë edhe një lokal në lagjen Nr.16 të qytetit.
Njoftim i policisë:
Durrës – Ndëshkohen me masë administrative, administratori i një call center-i dhe i një lokali
Në zbatim të masave kufizuese të shpallura nga Qeveria Shqiptare, për vënien në kontroll të pasojave që sjellin përhapjen e COVID-19, nga ana e Seksionit të Rendit në Komisariatin e Policisë Durrës, gjatë kontrollit të qytetit, për zbatimin e Telegramit të Drejtorit të Përgjithshëm të Policisë Shtetit me Nr. 1952 Prot., datë 10.03.2020 për “Moslejimin e grumbullimeve në ambientet e hapura dhe të mbyllura”, si dhe aktit normativ Nr. 3, datë 15.03.2020, gjatë ditës të sotme janë konstatuar subjektet si më poshtë:
- Subjekti call center, në lagjen nr. 1, Durrës, me përfaqësuese të autorizuar shtetasen M. Z. Pas kontrollit në ambientet e brendshme të këtij subjekti u konstatua se punonjësit nuk ishin të pajisur me masa mbrojtëse. Ky subjekt ka marrë masën administrative 700 000 lekë.
- Lokali nën administrimin e shtetases Sh. A., 51 vjeçe, me emërtimin “Bar-kafe”, në lagjen nr. 16, Durrës, ka marrë masë administrative 100 000 lekë.
Policia u bën thirrje qytetarëve t’u binden ndalesave të përcaktuara dhe të kufizojnë sa më shumë lëvizjet, për të mirën e përbashkët.
Kujtojmë këtu se kryeministri Edi Rama paralajmëroi gjoba për bizneset, të cilat nuk respektojnë rregullat e higjienës dhe masat ndaj COVID-19.
Gjithashtu kryeministri pohoi, se të gjithë ata që po qëndrojnë në shtëpi për shkak të koronavirusit, do të paguhen.
