Pas vitesh hetimi dhe depërtimi i Policisë në aplikacionin “Sky ECC”, hetuesit i dhanë një goditje të fortë mafies ndërkombëtare të drogës. Qendra ishte Belgjika! Kokaina hynte përmes portit dhe më pas përhapej në të gjithë Europën me makina, avionë privatë dhe anije. Dje në mëngjes, pikërisht në orën 05:00, 700 agjentë u shpërndanë në 49 lokacione të vendit për të shënuar goditjen e radhës të grupit kriminal.
Hetimi nisi pasi “koka” e bandës u arrestua në Spanjë në vitin 2018. Indikacioni i dytë iu dha hetuesve belgë kur ata kontrolluan një garazh në Bruksel më shtator 2020. Policia gjyqësore federale gjeti një sasi të madhe acetoni (e cila do përdorej për përpunimin e kokainës), disa kilogramë kanabis dhe uniforma të rreme policie. Kaq mjaftoi për të nisur hetimin. Më pas goditja e radhës erdhi nga Sky ECC në mars 2021. Papritur, hetimi mori përmasa të mëdha pasi banda rezultoi të kishte ndikim të madh, si në Evropë ashtu edhe më gjerë. Kontaktet i shtriheshin në vende si Brazili, Kolumbia dhe Peruja.
Por në Belgjikë, në krye ishte mafia shqiptare, e cila rrjedhimisht mori goditjen më të madhe. Policia belge kreu 114 kontrolle në shtëpi dhe 64 persona u arrestuan. Shumë prej tyre janë ende në burg. Hetuesit zbuluan gjithashtu 6 laboratorë ku përpunohej kokaina, me të cilën merreshin kolumbianët.
Porti i Antwerpit rezulton të jetë baza e trafikut të kokainës që sillet në këtë qytet nga Amerika e Jugut për t’u shpërndarë e tregtuar në vendet e tjera të Evropës pasi konsiderohej si vendi ideal për të hequr kokainën nga kontejnerët dhe për ta transportuar kështu në vende të tjera evropiane si Italia dhe Spanja. Për të “punuar”, çuditërisht, lidhjet e gjakut, rivaliteti apo klanet nuk kishin më rëndësi.
Qëllimi i tyre ishte i thjeshtë: të kushtonin sa më pak dhe të bënin sa më shumë fitime. Më pas ata vendosën ta pastrojnë të ardhurat përmes pasurive të paluajtshme, bizneseve legale dhe kriptomonedhave. Në operacionin e fundit u sekuestruan kokainë, para, orë luksoze, diamante dhe automjete luksoze. Detektivët kanë ndjekur edhe gjurmët e kokainës, ndërsa janë bërë kërkime në Spanjë, Itali, Gjermani, Kroaci dhe Holandë, ku vetëm në Belgjikë u arrestuan 30 persona.
