Gjatë protestës së 11 të AMT dhe opozitës para Bashkisë Tiranë, Dorian Teliti, një nga zërat kryesorë të opozitës, mbajti një fjalim ku shprehu vendosmërinë e protestuesve për të vazhduar luftën kundër asaj që ai e quajti mazhoranca korruptive. “Në këtë protestë të 11 ne kemi treguar diçka, që ne nuk dorëzohemi. Nuk dorëzohemi as para gardheve policore, as ndaj presioneve, as nga skafandrat që po afrohen tani, as nga dyqanet mediatike të blera,” deklaroi Teliti.
Ai shtoi se qëndresa e protestuesve mbështetet në të drejtën e qytetarëve dhe në detyrimin për të sjellë drejtësi për ata që kanë dëmtuar qytetin dhe vendin. “Nuk dorëzohemi sepse ne jemi me të drejtën, qytetarët. Nuk dorëzohemi deri ditën që ata që kanë vjedhur e po shkatërrojnë Tiranën e Shqipërinë të dalin para drejtësisë dhe të marrin dënimin e merituar,” theksoi ai.
Teliti theksoi gjithashtu se qëllimi i kësaj proteste është të kundërshtojë çdo përpjekje për të instaluar një formë të re diktature në vend, duke u shprehur se vetëm bashkimi i shqiptarëve mund t’i çojë ata drejt një ndryshimi të madh dhe rikthimit të demokracisë.
“Qëllimi i ndryshimit të madh, arrihet vetëm me protestë të qëndrueshme, periodike, pa kthim pas dhe protestë gjithnjë e më të shumtë. Prandaj të gjithë ne duhet të vazhdojmë të qëndrojmë më të bindur se kurrë se jemi në anën e të drejtës dhe përgjegjësia është në supet tona, përgjegjësia për ta bërë Tiranën një qytet normal dhe të jetueshëm,” përfundoi Teliti.
