Detaje të reja të rënda kanë dalë nga hetimet për vrasjen brutale të Martinës Carbonaro, 14 vjeçe, e cila u vra më 26 maj në Afragola, pranë Napolit.
Autori i dyshuar i krimit, Alessio Tucci, ish-i dashuri i saj, vetëm 18 vjeç, ka pranuar përgjegjësinë dhe ka rrëfyer gjithçka para gjykatës.
Në seancën dëgjimore të zhvilluar në burgun Poggioreale, Tucci ka treguar se gjithçka nisi pas një përpjekjeje të tij për të përqafuar Martinën, por që ajo e refuzoi.
Dy të rinjtë ndodheshin në një shtëpi të braktisur në një fermë pranë stadiumit “Moccia”, një vend që kishin frekuentuar shpesh gjatë lidhjes së tyre. Kur ajo i ktheu shpinën, ai e goditi me gur në kokë.
Sipas avokatit mbrojtës, Mario Mangazzo, Tucci e sulmoi fillimisht me një goditje, por më pas vazhdoi të godiste disa herë radhazi me të njëjtin gur.
Pasi vajza mbeti pa ndjenja, ai mbuloi trupin me mobilje dhe e fshehu në një dollap të një dhome të rrënuar, aty ku më vonë u gjet e pajetë nga autoritetet.
Aktualisht, Tucci ndodhet në një sektor të mbrojtur në burg dhe sipas mbrojtjes, është në një gjendje të rënduar psikologjike.
Avokati tha se i riu është “i rraskapitur, nuk fle dot dhe ka vështirësi të mëdha emocionale”, duke shtuar se është kërkuar zhvendosja e tij në një strukturë tjetër për arsye sigurie.
Në fund të seancës, që zgjati rreth një orë, 18-vjeçari shprehu keqardhje për krimin dhe kërkoi ndjesë përpara familjes së Martinës.
“Në atë moment nuk isha vetja… ishte një shpërthim xhelozie dhe zemërimi”, mësohet të ketë thënë ai përpara gjykatës.
Vendimi përfundimtar mbi vlefshmërinë e arrestimit dhe masën e sigurisë ndaj Tuccit pritet të merret në ditët në vijim.
Ngjarja ka tronditur opinionin publik në Itali dhe ka rindezur debatin për dhunën ndaj vajzave të mitura, si dhe nevojën për ndërhyrje më të hershme dhe edukim kundër dhunës gjinore.
